Pune Police : कर्नाटकच्या तुमकुर जिल्ह्यातल्या खुनाच्या प्रकरणातला आरोपी मधु पकडण्यात पुणे पोलिसांना यश आलं आहे. पुण्यात पोलिसांच्या जोरदार कारवाईत हा आरोपी पकडल्या गेला आहे. कर्नाटकच्या तुमकुर जिल्ह्यातला मधू खून करुन पळाला होता. व त्याने पोलिसांना चकवा द्यायला स्वतःचा फोन घरीच बंद ठेवला होता. पण प्रवासात एका सहप्रवाशाचा मोबाईल घेऊन केलेला एकच कॉल त्याच्यासाठी भलताच महागात पडला… आणि इथंच त्याचा खेळ संपला. (pune police)
खुनानंतर मधु मुंबईकडे पळत होता. बसमध्ये एका प्रवाशाचा फोन घेऊन त्याने वडिलांना फोन केला. त्याच कॉलचं लोकेशन कर्नाटक पोलिसांना मिळालं. मग लगेच बसचा नंबर, ट्रॅव्हल एजन्सी, रूट सगळी माहिती काढून त्यांनी पुणे पोलिसांना खबर दिली. बसचालकाला देखील आरोपीवर लक्ष ठेवायला सांगितलं होतं. पुणे पोलिस उपायुक्त निखिल पिंगळे यांनीही टीम तयार ठेवली.
बस पुण्यात आली तसं कात्रज चौकात अंमलदार रवींद्र भोरडे आणि त्यांच्या पथकाने बस अडवली. सीट नंबर 5 वर बसलेला मधु ओळखून त्याला लगेच ताब्यात घेतलं. चौकशीत कळलं की मधु आणि मृत महिला मंजुळा यांच्यात एक लाख रुपयांच्या देणी-घेणीवरून भरपूर वाद चालू होते. त्यातूनच मधुने संतापाच्या भरात धारदार शस्त्राने तिचा खून केल्याचं तपासात उघड झालं.
अटकेनंतर मधुला भारती विद्यापीठ पोलिस ठाण्यात आणलं. पुढची प्रक्रिया पूर्ण झाल्यानंतर कर्नाटक पोलिसांनी शिवाजीनगर सत्र न्यायालयातून ट्रान्झिट रिमांड घेऊन त्याला परत कर्नाटकला नेलं.
फक्त एका फोन कॉलमुळे आरोपीचा ठावठिकाणा लागून पोलिसांनी फिल्मी स्टाईलमध्ये केलेल्या या कारवाईचं सगळीकडे कौतुक होत आहे.
