Loni kalbhor : पुणे-सोलापूर महामार्गावरील थेऊर फाटा येथे कंटेनरवर बांधलेला अवजड लोखंडी रोल साखळी तुटल्याने थेट महामार्गावर कोसळला. सुदैवाने, या घटनेत कोणतीही जीवितहानी झाली नसली तरी चालक मात्र थोडक्यात बचावला. या घटनेमुळे महामार्गावर मोठी वाहतूक कोंडी झाली होती. सोमवारी (ता. 06) सायंकाळी सात वाजण्याच्या सुमारास हि घटना घडली. (Loni kalbhor)
मिळालेल्या माहितीनुसार, सोमवारी सायंकाळी सात वाजण्याच्या सुमारास एक कंटेनर लोखंडी रोल घेऊन पुण्याच्या दिशेने जात होता. थेऊर फाटा परिसरात आला असता, थेऊर बाजूकडे वळण घेत असताना अचानक कंटेनरवरील रोलला बांधलेली लोखंडी साखळी तुटली. क्षणात हा अवजड रोल चालकाच्या पाठीमागील बाजूला जाऊन आदळला. सुदैवाने हा रोल एखाद्या दुचाकी किंवा कारवर पडला असता, तर मोठी जीवितहानी झाली असती.
यावेळी कंटेनर केबिनचे नुकसान झाले तर चालकाने तात्काळ गाडी थांबवून खाली उडी मारली. त्यामुळे हा लोखंडी पत्र्याचा रोल रस्त्यावर आदळला. ज्यावेळी हा रोल पडला, त्यावेळी आजूबाजूला इतर वाहने नसल्याने मोठा अनर्थ टळला. हा लोखंडी रोल वजनाने अत्यंत जास्त असल्याने तो रस्त्याच्या मधोमध पडून राहिला. यामुळे पुण्याहून सोलापूरकडे जाणाऱ्या वाहतुकीचा पूर्णतः बोजवारा उडाला. सायंकाळची वेळ असल्याने महामार्गावर वाहनांची वर्दळ जास्त होती, परिणामी काही वेळातच वाहनांच्या दोन ते तीन किलोमीटरपर्यंत लांबच लांब रांगा लागल्या होत्या.
दरम्यान, घटनेच्या वेळी वाहतूक पोलीस त्या ठिकाणी असल्याने पोलिसांनी व परिसरातील नागरिकांनी रस्त्यावर पडलेला अवजड रोल बाजूला सारण्यासाठी क्रेन पाचारण करण्यात आले असून वाहतूक कोंडी सोडवण्यासाठी वाहतूक पोलीसंकडून प्रयत्न सुरु आहेत.
