पुणे : हडपसर ते सासवड रस्त्यावर व फुरसुंगी (ता. हवेली) ग्रामपंचायत हद्दीत पडलेल्या जीवघेण्या खड्ड्यांकडे लोकप्रतिनिधीचे लक्ष वेधून घेण्यासाठी सोसायट्यांच्या बाहेर खड्ड्यांविरोधात नागरिकांनी रस्त्यातच पुणेरी पाट्या लावत आपला संताप व्यक्त केला आहे. सासवड रोडवरच्या सद्गुरू सोसायटीमधील रहिवाशांनी या पाट्या लावल्या आहेत.
“आयुष्य खूप सुंदर आहे फक्त सासवड रोडवर येऊ नका”, “एकतर रस्ता मिळेल, नाहीतर खड्डा दोन्ही लाड एकत्र फक्त पुणे महापालिका पुरवणार”, “या रे या सारे या रस्त्यावर खड्यांमध्ये पोहू या गटारात लोळू या तोंड फोडून घेऊ या “ यासह इतर पट्या लावत नागरिकांनी निषेध व्यक्त केला आहे.
सद्गुरू सोसायटीने पाट्या लावल्या असलेल्या तरी प्रशानसाने याबाबत अद्याप कोणतीही दखल घेतलेली नाही. रस्त्याची दुरावस्ता पाहून बाहेर निघताना भीती वाटते. याठिकाणी अनेक अपघात होत आहेत. यामध्ये अनेकांचा मृत्यू झाला आहे. रस्त्यातील खड्डे ही सर्वच ठिकाणची समस्या आहे. खड्ड्यांनी त्रस्त व खड्ड्यांबाबत वैतागलेल्या फुरसुंगीतील नागरिकांनी त्यांच्या स्टाईलने आंदोलन केलं आहे.
पुणे तेथे काय उणे…किमान शब्दात कमाल अपमान, हीच पुणेकरांची खास शैली. त्यातुन जन्मल्या पुणेरी पाट्या. त्यामुळे ही समस्या प्रशानाने सोडवली पाहिजे. प्रशासाने आमच्या आंदोलनाची वेळीच दखल घेतली नाही तर येत्या काळात आम्ही येथे रास्तारोको आंदोलन करण्यात येणार असून आगामी निवडणुकीवर बहिष्कार टाकण्याची भूमिका घेण्याचा इशारा येथील नागरिकांनी दिला आहे.
दरम्यान, गणोशोत्सव मंडळांनी मंडप काढले मात्र मंडप उभारणीसाठी केलेले खड्डे तसेच ठेवल्याचे प्रकार काही ठिकाणी समोर आले आहे. त्यामुळे आधीच रस्त्यावर असलेल्या खड्ड्यांमध्ये यामुळे भर पडली आहे.
