पुणे: पुण्यात पादचाऱ्यांना लुटणाऱ्या टोळीप्रमुखासह त्याच्या साथीदारास लष्कर पोलिसांनी बेड्या ठोकल्या आहेत. त्यांच्याकडून चोरी केलेले मोबाईल आणि नंबरप्लेट नसलेली मोपेड जप्त केली आहे. आयान फिरदोस पठाण (वय १८ वर्ष) आणि अनिकेत दामु आरणे (वय २० वर्ष, दोघे रा. भवानी पेठ) असे अटक केलेल्या आरोपांची नावे आहेत. 15 मे रोजी लष्कर भागातील साचापीर स्ट्रीट परिसरात एका पादचाऱ्याच्या हातातील मोबाइल दुचाकीस्वार चोरट्यांनी हिसकावून नेल्याची घटना घडली होती. याप्रकरणी एकाने लष्कर पोलीस ठाण्यात तक्रार दिली होती.
पोलिसांनी दिलेल्या माहितीनुसार, तक्रारदार गुरुवारी सायंकाळी सहा वाजण्याच्या सुमारास साचापीर स्ट्रीट परिसरातून जात होते. तेंव्हा दुचाकीस्वार चोरट्यांनी मागून येत त्यांच्या हातातील मोबाइल हिसकावून नेला. पोलिसांनी आरोपीचा शोध घेण्यासाठी परिसरातील सीसीटीव्ही फुटेज तपासले असता पोलिसांना चोरी करणारे आयान आणि अनिकेत असल्याची माहिती समोर आली. त्यानंतर पोलिसांनी भवानी पेठेत जावून आरोपींचा शोध घेतला. तेव्हा आरोपी एका दुचाकीवरून जाताना दिसून आले. तेव्हा पोलिसांनी त्यांना अटक केली.
दरम्यान, पोलीसांनी अधिक तपास केला असता दोघांनी एका अल्पवयीनासोबत मिळून चोऱ्या करीत असल्याचे कबूल केले. त्यानंतर पोलिसांनी दोघांना अटक करून त्यांच्याकडून चोरीचे मोबाईल आणि नंबरप्लेट नसलेली मोपेड जप्त करण्यात आली आहे. तसेच अधिक तपासात आरोपींनी लष्कर आणि खडक पोलीस स्टेशनच्या हद्दीत अनेक ठिकाणी पादचाऱ्यांना लुटल्याचे निष्पन्न झाले.
अतिरिक्त पोलीस आयुक्त प्रविणकुमार पाटील, उपायुक्त स्मार्तना पाटील, सहायक आयुक्त दिपक निकम यांच्या मार्गदर्शनाखाली वरिष्ठ निरीक्षक गिरिषकुमार दिघावकर, गुन्हे शाखेचे निरीक्षक प्रदीप पवार, उपनिरीक्षक राहुल घाडगे, शेखर मोकाटे, पोलीस अंमलदार महेश कदम, अतुल मेंगे, संदिप उकिरडे, सोमनाथ बनसोडे, सचिन मांजरे, रमेश चौधर, सागर हराळ, लोकेश कदम, अमोल कोडिलकर यांच्या पथकाने ही कामगिरी केली.
