पुणे : नाशिकमधील भोंदू अशोक खरात प्रकरणावरून राज्याच्या राजकारणात आरोप-प्रत्यारोप सुरूच आहेत. राष्ट्रवादी काँग्रेसच्या नेत्या रुपाली ठोंबरे-पाटील यांनी राज्य महिला आयोगाच्या माजी अध्यक्षा रुपाली चाकणकर यांच्यासह या प्रकरणाच्या एसआयटी प्रमुख तेजस्वी सातपुते यांच्यावर गंभीर आरोप केले आहेत. चाकणकर यांच्या सांगण्यावरून सातपुते यांनी पुण्यात असताना खोटे गुन्हे दाखल केल्याचा दावा ठोंबरे-पाटील यांनी केला आहे. तसेच चाकणकर यांनी आपल्या पदाचा गैरवापर केल्याचाही आरोप त्यांनी केला.

रुपाली ठोंबरे-पाटील यांनी सांगितले की, अशोक खरात प्रकरणातील एसआयटी प्रमुख तेजस्वी सातपुते यांची त्यांनी भेट घेतली होती. यावेळी रुपाली चाकणकर यांच्याविरोधात गुन्हा दाखल करण्याची विनंती केली होती. मात्र, सातपुते यांनी शेवटपर्यंत चाकणकर यांच्याविरोधात तक्रार दाखल केली नाही. दुसरीकडे, चाकणकर यांच्यावर टीका करणाऱ्यांविरोधात मात्र गुन्हे दाखल करण्यात आले, असा आरोप त्यांनी केला.
तेजस्वी सातपुते यांची पुण्यात बदली झाल्यानंतर सात महिन्यांनी एक कथित खोटी तक्रार दाखल करण्यात आली होती. ही तक्रार रुपाली चाकणकर यांच्या सांगण्यावरून दाखल करण्यात आल्याचा दावाही ठोंबरे-पाटील यांनी केला.

तेजस्वी सातपुते यांच्या आतापर्यंतच्या बदल्या अशोक खरातच्या माध्यमातून, म्हणजेच स्वतःच्या माध्यमातून होत असल्याचे रुपाली चाकणकर सांगायच्या, असा दावा ठोंबरे-पाटील यांनी केला. खरातसोबत फोटो आहेत म्हणून चाकणकर यांच्यावर आरोप करत नसून, त्या खरातच्या ट्रस्टवर होत्या, या कारणावरून प्रश्न उपस्थित करत असल्याचेही त्यांनी स्पष्ट केले.
रुपाली चाकणकर, त्यांच्या बहिणी आणि कुटुंबीयांच्या नावावर पतसंस्थेत कोट्यवधी रुपयांचे व्यवहार झाल्याचा आरोप ठोंबरे-पाटील यांनी केला. अशोक खरातशी संबंधित अनेक आर्थिक प्रकरणांमध्ये चाकणकर यांच्या बहिणीचे नाव नॉमिनी म्हणून असल्याचा दावाही त्यांनी केला. असे असतानाही संबंधितांवर गुन्हे दाखल का झाले नाहीत, असा सवाल त्यांनी उपस्थित केला.
रुपाली चाकणकर यांनी अनेक महिला आणि राजकीय नेत्यांना अशोक खरात याच्याकडे नेल्याचा आरोपही ठोंबरे-पाटील यांनी केला. खरातकडे गेलेल्या काही राजकारण्यांना आता धमक्या दिल्या जात असल्याचा दावा त्यांनी केला. “मला वाचवा, नाहीतर तुमचे फोटो व्हायरल करेन,” अशा प्रकारच्या धमक्या दिल्या जात असल्याचा आरोपही त्यांनी केला.
तसेच, चाकणकर यांच्या सांगण्यावरून पोलिसांच्या माध्यमातून खोटे गुन्हे दाखल करण्यात आले. त्यांनी पत्रकार खेमनार यांना माफी मागण्यास भाग पाडले, असाही दावा ठोंबरे-पाटील यांनी केला. हे सर्व प्रकार पदाचा गैरवापर करून करण्यात आल्याचा आरोप त्यांनी केला आहे.






