डॉ. अशोक बालगुडे

पुणे : जिभेला चव आणि शरीराला आजार देणाऱ्या जंक फूडच्या वाढत्या मोहाला आवर घालण्यासाठी इंडियन सायकलिंग क्लबच्या चार सदस्यांनी थेट सायकलचीच घंटी वाजवली! पिंपळे निलख येथील या क्लबच्या चार सायकलस्वारांनी पुणे ते शिर्डी असे 180 किलोमीटरचे अंतर सायकलवरून पार करीत सकस आहाराचा संदेश दिला. क्लबची ही नववी शिर्डीवारी ठरली. रस्त्यावर पेडल मारतानाच नारायणगाव आणि कोऱ्हाळे येथे नागरिकांशी संवाद साधून त्यांनी जंक फूडच्या दुष्परिणामांबाबत प्रबोधन केले.
आजच्या मुलांच्या हातात पुस्तकापेक्षा मोबाइल आणि डब्यात घरच्या पोळीपेक्षा जंक फूड अधिक दिसू लागले आहे. चवीच्या नादात आरोग्याची किंमत मोजण्याची वेळ येऊ नये, यासाठी जनजागृती आवश्यक असल्याचे सायकलस्वार प्रा. सुनील अडसुळे यांनी सांगितले. जंक फूडचे दुष्परिणाम केवळ शरीरापुरते मर्यादित नसून मानसिक आणि सामाजिक आरोग्यावरही होऊ शकतात, असे त्यांनी स्पष्ट केले.

पहाटे सायकलची घंटी; चंदनापुरी घाटात खरी कसोटी!
शनिवारी (दि. 14) पहाटे 3.45 वाजता जगताप डेअरी येथून या सायकलवारीला सुरुवात झाली. राजगुरुनगर येथे पहिला थांबा घेतल्यानंतर सायकलस्वार नारायणगावला पोहोचले. तेथे अल्पोपहाराबरोबरच जनजागृतीचा कार्यक्रम झाला. पुढे आळेफाटा मार्गे माऊली येथील श्री साईबाबा मंदिरात त्यांनी विश्रांती घेतली.
माऊली ते संगमनेर हा टप्पा मात्र सायकलस्वारांची खरी परीक्षा पाहणारा ठरला. चढ, जोराचा वारा आणि वाढते ऊन यांच्याशी सामना करीत त्यांनी चंदनापुरीचा घाट पार केला. थकवा आला, तरी जिद्दीचा वेग कमी झाला नाही. संगमनेरजवळ भोजनाचा थांबा घेतल्यानंतर समनापूरमार्गे शिर्डीकडे कूच केले. कोऱ्हाळे येथे नागरिकांशी संवाद साधत सायंकाळी सहा वाजता त्यांनी शिर्डी गाठली.
‘श्रद्धा आणि सबुरी’चा प्रवासातही प्रत्यय
क्लबचे अध्यक्ष चंद्रकांत ववले, संतोष दरेकर, संदीप बोडके आणि प्रा. सुनील अडसुळे या चौघांनी ही मोहीम पूर्ण केली. शिर्डीत श्री साईबाबांचे दर्शन घेतल्यानंतर ‘श्रद्धा आणि सबुरी’ या शिकवणीतून प्रतिकूल परिस्थितीतही ध्येय गाठण्याची प्रेरणा मिळाल्याची भावना त्यांनी व्यक्त केली. आशुतोष देसले, संजय टिळेकर आणि संतोष इंगवले यांनी प्रवासात आवश्यक मदत केली.
सायकलच्या पेडलवर सामाजिक प्रबोधन!
इंडियन सायकलिंग क्लबची ओळख केवळ सायकलवारीपुरती नाही. ‘झाडे लावा, झाडे जगवा’, ‘बेटी बचाओ, बेटी पढाओ’ आणि ‘सायकल वापरा, प्रदूषण टाळा’ अशा विषयांवर क्लबने यापूर्वी जनजागृती केली आहे. पुणे–कन्याकुमारी, पुणे–गोवा, पुणे–अक्कलकोट, पुणे–त्र्यंबकेश्वर आणि अष्टविनायक अशा सायकलवाऱ्या क्लबने पूर्ण केल्या आहेत. पुणे–शिर्डीची ही नववी, तर पुणे–पंढरपूरची चौथी वारी ठरली.
सायकलचे पेडल फिरवताना सामाजिक परिवर्तनाचे चाकही फिरावे, हा क्लबचा प्रयत्न आहे. कारण जंक फूडच्या जाहिरातींना उत्तर देण्यासाठी केवळ उपदेश पुरेसा नाही; आरोग्यदायी जीवनशैलीचा प्रत्यक्ष आदर्शही उभा करावा लागतो. या चार सायकलस्वारांनी 180 किलोमीटरचा प्रवास करून तोच आदर्श घालून दिला!







