पुणे : दिवंगत उपमुख्यमंत्री अजित पवार यांच्या विमान अपघाताचे नेमके सत्य समोर यावे आणि या घटनेची पारदर्शक चौकशी व्हावी, अशी आग्रही मागणी खासदार सुप्रिया सुळे यांनी केली आहे. या अपघातामागील खरे कारण शोधून संपूर्ण माहिती देशाला आणि महाराष्ट्राला दिली जाईल, असा शब्द मुख्यमंत्री फडणवीस आणि केंद्रीय गृहमंत्री अमित शहा यांनी जाहीरपणे दिला असल्याची आठवणही सुळे यांनी माध्यमांशी बोलताना करून दिली.

दुसरीकडे, या अपघाताबाबत जनतेच्या आणि कार्यकर्त्यांच्या मनातील संशय दूर करण्यासाठी ॲड. नितीन संजय यादव यांनी माहिती अधिकारांतर्गत सीसीटीव्ही फुटेजची मागणी केली होती. मात्र, प्रशासनाने त्यांचे हे अर्ज फेटाळून लावले आहेत. नागरी विमान सुरक्षा ब्युरोनंतर आता मुंबई पोलिसांनीही फुटेज देण्यास स्पष्ट नकार दिल्याचा दावा ॲड. यादव यांनी केला आहे. त्यांनी मुंबई पोलिसांनी दिलेले उत्तर आणि विमान सुरक्षा ब्युरोने प्रथम अपील फेटाळताना दिलेली कागदपत्रेही समोर आणली आहेत.
ॲड. यादव यांनी 28 जानेवारी 2026 रोजीच्या पहाटे 6 ते सकाळी 9 या कालावधीतील मुंबई विमानतळावरील चित्रीकरण मागितले होते. नागरी विमान वाहतूक विभागाने आणि नंतर ब्युरोने सर्वसामान्यांना हे फुटेज देता येणार नाही असे सांगत अपील नाकारले. यासोबतच, अजित पवार यांच्या मुंबईतील ‘देवगिरी’ या शासकीय निवासस्थानापासून विमानतळापर्यंतच्या प्रवासाचे फुटेज मिळावे, असा अर्ज मुंबई पोलिसांकडे करण्यात आला होता. ही माहिती सार्वजनिक हिताची नसून एखाद्याच्या वैयक्तिक आयुष्यात हस्तक्षेप करणारी असल्याचे कारण देत पोलिसांनी ती नाकारली.

महत्त्वाचे म्हणजे, विमान सुरक्षा ब्युरोने हे फुटेज पोलिसांकडे सुपूर्द केल्याचे उत्तरात म्हटले आहे. त्यामुळे चित्रीकरण उपलब्ध असूनही ते जनतेपासून का लपवले जात आहे, असा सवाल यादव यांनी विचारला आहे. अजित पवार हे राज्याचे जबाबदार लोकप्रतिनिधी आणि संविधानिक पदावर होते, त्यामुळे ही माहिती खासगी ठरवणे अयोग्य आहे. जर यामागे कोणताही घातपात नसेल, तर केंद्र आणि राज्य सरकारने सर्व उपलब्ध सीसीटीव्ही फुटेज तात्काळ सार्वजनिक करून नागरिकांच्या मनातील शंकांचे निरसन करावे, अशी मागणी त्यांनी केली आहे.







