विशाल शिंदे

सांगवी बुद्रुक | कापूरहोळ : वडिलोपार्जित जमिनीच्या हक्कसोडपत्रावरून निर्माण झालेल्या वादाचे पर्यवसान थेट निर्घृण खुनात झाल्याची धक्कादायक घटना भोर तालुक्यातील सांगवी बुद्रुक येथे घडली आहे. गावचे ५० वर्षीय पोलीस पाटील अशोक साधू येनपूरे यांच्यावर धारदार कोयत्याने वार करून त्यांची हत्या करण्यात आली. सोमवारी (दि. १६) सायंकाळी सहाच्या सुमारास गावच्या हद्दीतील लमनदेव मंदिराजवळ ही घटना घडली. या घटनेने संपूर्ण परिसर हादरला असून गावासह आसपासच्या भागात हळहळ आणि संताप व्यक्त केला जात आहे.
मिळालेल्या माहितीनुसार, अशोक येनपूरे हे सोमवारी सायंकाळी शेतातील काम आटोपून मोटारसायकलवरून घरी परतत होते. यावेळी लमनदेव मंदिराजवळील रस्त्यावर आरोपींनी त्यांना अडवले. आरोपींच्या आई लीलाबाई यांच्या वडिलोपार्जित जमिनीचे हक्कसोडपत्र करून देण्यावरून अशोक येनपूरे यांच्याशी यापूर्वीपासून वाद सुरू असल्याचे समोर आले आहे. याच वादातून प्रतीक शेजवळ (रा. सांगवी बुद्रुक) आणि त्याच्यासोबत असलेल्या अन्य दोन अनोळखी व्यक्तींनी येनपूरे यांच्यावर धारदार कोयत्याने हल्ला केला.

या हल्ल्यात त्यांच्या डोक्यावर, उजव्या कानावर आणि उजव्या हाताच्या दंडावर वार करण्यात आले. गंभीर जखमी झाल्याने अशोक येनपूरे यांचा मृत्यू झाला. भररस्त्यात घडलेल्या या घटनेमुळे गावातील नागरिकांमध्ये भीतीचे वातावरण निर्माण झाले आहे.
या प्रकरणी मृत अशोक येनपूरे यांचे पुत्र शुभम अशोक येनपूरे (वय २३) यांनी राजगड पोलीस ठाण्यात फिर्याद दिली आहे. त्यानुसार प्रतीक शेजवळ आणि त्याच्यासोबत असलेल्या दोन अनोळखी व्यक्तींविरोधात खुनाचा गुन्हा दाखल करण्यात आला आहे.
पोलीस ठाण्यासमोर ग्रामस्थांचा ठिय्या
घटनेनंतर अशोक येनपूरे यांचा मृतदेह रुग्णवाहिकेतून राजगड पोलीस ठाण्यासमोर आणण्यात आला. यावेळी संतप्त महिला आणि ग्रामस्थांनी रुग्णवाहिकेला घेराव घालत आरोपींना तातडीने अटक करण्याची मागणी केली. आरोपींना अटक केल्याशिवाय मृतदेह येथून हलविणार नाही, अशी ठाम भूमिका ग्रामस्थांनी घेतली. त्यामुळे पोलीस ठाण्याच्या परिसरात काही काळ तणावाचे वातावरण निर्माण झाले.
परिस्थितीचे गांभीर्य लक्षात घेऊन राजगड पोलिसांनी मृताच्या कुटुंबीयांना लेखी आश्वासन दिले. अंत्यविधीची प्रक्रिया पूर्ण करावी, आरोपींना लवकरात लवकर अटक करून कायदेशीर कारवाई करण्यात येईल, असे आश्वासन पोलिसांकडून देण्यात आले. त्यानंतर ग्रामस्थांनी मृतदेह ताब्यात घेतला. अशोक येनपूरे यांच्यावर त्यांच्या मूळ गावी अंत्यसंस्कार करण्यात येणार आहेत.
आरोपींना अटक न झाल्यास महामार्ग रोखण्याचा इशारा
पोलिसांनी दिलेल्या आश्वासनानंतर ग्रामस्थांनी मृतदेह ताब्यात घेतला असला, तरी आरोपींच्या अटकेबाबत ग्रामस्थांची भूमिका आक्रमक आहे. दिलेल्या मुदतीत आरोपींना अटक झाली नाही, तर पुणे-सातारा महामार्ग रोखून तीव्र आंदोलन करण्यात येईल, असा इशारा ग्रामस्थांनी दिला आहे. त्यामुळे या प्रकरणाकडे संपूर्ण भोर तालुक्याचे लक्ष लागले आहे.
संपूर्ण परिसरात हळहळ; पोलिसांच्या तपासाकडे लक्ष
अशोक येनपूरे हे सर्वांशी मिळून-मिसळून वागणारे व्यक्तिमत्त्व असल्याची भावना ग्रामस्थांकडून व्यक्त होत आहे. त्यांच्या अचानक झालेल्या मृत्यूमुळे कुटुंबीयांवर दुःखाचा डोंगर कोसळला असून गावातील नागरिकांनाही मोठा धक्का बसला आहे. एका जमिनीच्या वादातून गावातील जबाबदार व्यक्तीचा जीव जाणे ही अत्यंत दुर्दैवी बाब असल्याची भावना नागरिक व्यक्त करीत आहेत.
या प्रकरणातील सर्व आरोपींचा शोध घेऊन त्यांना तातडीने अटक करावी, घटनेमागील संपूर्ण पार्श्वभूमी तपासावी आणि भविष्यात अशा घटना घडू नयेत यासाठी ठोस उपाययोजना कराव्यात, अशी मागणी ग्रामस्थांकडून होत आहे.






