हडपसर, ता. 17 : ‘तू इथे कमवून खायला आलेला आहेस, तुला नीट राहायला येत नाही का?’ असे म्हणत पाच जणांच्या टोळक्याने वाहनचालक तरुणाला शिवीगाळ करून बेदम मारहाण केली. त्यानंतर लोखंडी हत्याराने थेट छातीत वार करून त्याला जीवे मारण्याचा प्रयत्न केल्याची धक्कादायक घटना मांजरी बुद्रुक येथील गोपाळपट्टी परिसरात घडली. या प्रकरणी मांजरी पोलिसांनी दोघांना अटक केली असून, अन्य तिघांविरुद्धही खुनाचा प्रयत्न केल्याचा गुन्हा दाखल केला आहे.

सिद्धार्थ बसवराज स्वामी (वय-27, रा. ढेरे बंगल्याजवळ, गोपाळपट्टी, मांजरी बुद्रुक) असे हल्ल्यात गंभीर जखमी झालेल्या तरुणाचे नाव आहे. त्यांच्यावर योग हॉस्पिटलमध्ये उपचार सुरू आहेत. ही घटना 15 नोव्हेंबर रोजी रात्री नऊच्या सुमारास गोपाळपट्टी येथील शिवशाही हॉटेलजवळ घडली.
याप्रकरणी सिद्धार्थ स्वामी यांनी दिलेल्या फिर्यादीवरून अभिषेक संतोष पात्रे (वय-22 ) आणि रोहन उत्तम मांढवे (वय-22, दोघेही रा. मांजरी) यांना अटक करण्यात आली आहे. तर प्रवीण भारती, नीलेश कुतरवाडे आणि अखिलेश होनमाने (सर्व रा. गोपाळपट्टी, मांजरी बुद्रुक) यांच्याविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, सिद्धार्थ स्वामी हे वाहनचालक म्हणून काम करतात. 15 नोव्हेंबर रोजी रात्री ते शिवशाही हॉटेल येथे गेले होते. हॉटेलजवळील पानटपरी परिसरात ते थांबले असताना पाचही आरोपी तेथे आले. स्वामी यांचा आरोपींशी कोणताही वाद नसताना आरोपींनी त्यांना ‘तू इथे कमवून खायला आलेला आहेस, तुला नीट राहायला येत नाही का?’ असे म्हणत शिवीगाळ केली.
त्यानंतर ‘तुला जिवंत सोडणार नाही, मारून टाकेन,’ अशी धमकी देत लाथाबुक्क्यांनी मारहाण केली. यावेळी प्रवीण भारती याने हातातील लोखंडी हत्याराने स्वामी यांच्या छातीत वार करून त्यांना गंभीर जखमी केले. त्यानंतर आरोपींनी हातातील हत्यारे हवेत फिरवत ‘आम्ही इथले भाई आहोत, आमच्या नादाला लागला तर खल्लास करू,’ अशी धमकी देत परिसरात दहशत निर्माण केल्याचे फिर्यादीत नमूद आहे. या प्रकरणाचा पुढील तपास पोलीस उपनिरीक्षक शुभम म्हेत्रे करीत आहेत.






