सांगली : चिपळूण तालुक्यातील वालोपे परिसरात एका ३३ वर्षीय तरुणाची निर्घृण हत्या झाल्याची धक्कादायक घटना समोर आली आहे. नवनाथ बबन कांबळे असे मृत तरुणाचे नाव असून, त्याच्या डोक्यावर जांभ्या दगडाने वार करून हत्या करण्यात आल्याचा पोलिसांचा प्राथमिक अंदाज आहे. वालोपे येथील रेल्वे स्टेशनकडे जाणाऱ्या रस्त्यावर झुलाई जनरल स्टोअर्सच्या मागील बाजूस त्याचा मृतदेह रक्ताच्या थारोळ्यात आढळला. हत्येमागचे कारण अद्याप स्पष्ट झालेले नाही. चिपळूण पोलिसांकडून अज्ञात आरोपीचा शोध सुरू आहे.

नवनाथ कांबळे हा मूळचा सांगली जिल्ह्यातील वांगी, तालुका खडेगाव येथील रहिवासी होता. तो चिपळूणमध्ये आपल्या बहिणीकडे राहत होता. मिळालेल्या माहितीनुसार, सोमवारी (१६ नोव्हेंबर) रात्री सुमारे नऊ वाजण्याच्या सुमारास तो घरातून बाहेर पडला होता. मात्र, त्यानंतर तो घरी परतला नाही.
मंगळवारी सकाळी वालोपे परिसरात रेल्वे स्टेशनकडे जाणाऱ्या रस्त्यावर एक व्यक्ती रक्ताच्या थारोळ्यात पडल्याची माहिती पोलिसांच्या डायल ११२ क्रमांकावर देण्यात आली. त्यानंतर पोलिसांनी तातडीने घटनास्थळी धाव घेतली.

चिपळूण पोलीस ठाण्याचे पोलीस निरीक्षक प्रशांत आवारे यांनी दिलेल्या माहितीनुसार, पोलिसांनी घटनास्थळी पोहोचल्यानंतर मृत व्यक्तीची ओळख पटवण्याचे प्रयत्न सुरू केले. परिसरातील नागरिकांकडे चौकशी केली असता एका व्यक्तीने मृत तरुणाच्या बहिणीच्या पतीला ओळखत असल्याचे सांगितले.
त्यानंतर बहिणीच्या पतीला घटनास्थळी बोलावण्यात आले. त्यांनी मृतदेहाची ओळख पटवून हा आपला मेहुणा नवनाथ कांबळे असल्याचे सांगितले. नवनाथला दारू पिण्याचे व्यसन होते आणि तो मागील रात्रीपासून घराबाहेर गेला होता, अशी माहितीही त्यांनी पोलिसांना दिली.
पोलिसांना घटनास्थळी नवनाथच्या डोक्याजवळ जांभा दगड आढळून आला आहे. अज्ञात व्यक्तीने अज्ञात कारणावरून या दगडाने डोक्यावर वार केला असावा किंवा अन्य प्रकारे मारहाण केली असावी, असा पोलिसांचा प्राथमिक अंदाज आहे. गंभीर जखमी झाल्याने नवनाथचा मृत्यू झाल्याचे पोलिसांनी सांगितले.
घटनेचे गांभीर्य लक्षात घेऊन पोलिसांनी फॉरेन्सिक व्हॅन, श्वान पथक आणि फिंगरप्रिंट तज्ज्ञांना घटनास्थळी पाचारण केले आहे. घटनास्थळावरील पुरावे आणि तांत्रिक माहितीच्या आधारे आरोपीचा शोध घेण्याचे प्रयत्न सुरू आहेत. मात्र, या हत्येमागचे नेमके कारण अद्याप समोर आलेले नाही.






