Solapur Crime : सोलापूर : सोलापूरमध्ये लग्नाच्या दिवशीच नववधूने गळफास घेऊन आत्महत्या केल्याची घटना घडली आहे. तरुणीला ब्लॅकमेल करून तिचे ठरलेले लग्न मोडण्यासाठी तिच्या नवरदेवाकडे खोटी अश्लिल छायाचित्रे पाठवण्यात आली होती. नववधूच्या सरळ स्वभावाचा गैरफायदा घेऊन तिला फसवण्यात आले होते. अशा परीस्थीतीत वैफल्यग्रस्त होऊन नववधूने लग्नाच्या दिवशीच पहाटे गळफास घेऊन आत्महत्या केली. सालिया महिबूब शेख (वय २५) असे आत्महत्या केलेल्या नववधूचे नाव आहे.
विशेष म्हणजे लग्नाच्या तीन दिवसांपूर्वीच तिने पोलिसांकडे होणाऱ्या त्रासाबद्दल कारवाईची मागणी केली होती. परंतु पोलिसांनी कारवाई न केल्याने आणि तरुणांचा त्रास वाढल्याने तिचे लग्नही मोडले. त्यामुळे नववधूने टोकाचे पाऊल उचलले. कुमठे गावातील ओम नमःशिवाय नगरात पहाटे नववधूने आत्नहत्या केली. संबंधित तिघा तरुणांवर जोपर्यंत गुन्हा दाखल होत नाही आणि त्यांना अटक होत नाही, तोपर्यंत नववधू मुलीचा मृतदेह ताब्यात घेणार नाही, असा पवित्रा उद्विग्न झालेल्या शेख कुटुंबीयांनी घेतला होता.
मृत सालिया हिचे वडीलांनी दिलेल्या माहितीनुसार, सालिया हिने डी. फार्मसीची पदविका घेतली होती. गावातील समीर चाँदसाहेब शेख, सलमान पीरसाहेब शेख आणि वसीम शेख हे तिघे तरुण सतत तिला त्रास द्यायचे. तिचे लग्न जुळल्यानंतर लग्न करू नको, आम्ही हे लग्न होऊ देणार नाही, तुझी बदनामी करू, अशी धमकी देत ब्लॅकमेलिंग करायचे. तिचे लग्न आज सोमवारी, १८ डिसेंबर ला होणार होते. तिघा तरुणांकडून त्रास देणे थांबत नसल्यामुळे त्यांच्या विरुद्ध सालिया व तिच्या वडिलांनी विजापूर नाका पोलीस ठाण्यात तक्रारी अर्ज दिला होता. परंतु पोलिसांनी हे प्रकरण वेळीच गांभीर्याने घेतले नाही. तिघांनी तिचे छायाचित्र मोर्फ करून अश्लील बनवले आणि नवरदेवाकडे पाठविले. तेव्हा नवरदेवाने तत्काळ लग्न मोडीत काढले. छतावरील विद्युत पंख्याला ओढणीच्या साह्याने गळफास घेऊन स्वतःला संपविले.
