पुणे : यंदाच्या नवरात्रीच्या निमित्ताने ‘सेक्स तंत्र’ नावाने तीन दिवसीय कोर्सचे आयोजन केल्याची धक्कादायक जाहिरात सध्या सोशल मिडीयावर व्हायरल होत आहे. यात सहभागी घेणाऱ्याला प्रत्येकी १५ हजार फी भरायची आहे. तर सायबर पोलीस ‘सत्यम शिवम सुंदरम फाउंडेशन या संस्थेचा शोध घेत आहेत.
‘सेक्स तंत्र’ या कोर्सचे आयोजन ‘सत्यम शिवम सुंदरम फाउंडेशन’ या संस्थेतर्फे करण्यात आले आहे. हा कोर्स पुण्यातील कॅम्प भागात १, २ आणि ३ ऑक्टोबरला होणार आहे.
या जाहिरातीबरोबर एक क्यूआर कोड देखील देण्यात आला असून ज्याद्वारे आयोजकांशी संपर्क साधता येणार आहे.
यात अभ्यासक्रमाच्या ऑनलाइन नोंदणीसाठी एक क्रमांक दिला असून, यासाठी प्रति व्यक्तीकडून १५ हजार रुपये शुल्क आकारले जाईल. तसेच यात वैदिक सेक्स तंत्रासह पुढील कोर्स शिकवले जाणार असल्याचे नमूद केले आहे.
१) वैदिक सेक्स तंत्र – (Vedic sex techniques)
२) दैवी स्त्रीलिंगी पुल्लिंगी अवतार – ( Divine Feminine Masculine Embodiment)
३) चक्र सक्रिय करणे – (cycle activation)
४) ओशो ध्यान – (Osho Meditation)
दरम्यान, पुणे सायबर पोलिसांनी याची चौकशी सुरु केली आहे. या कोर्सच्या आयोजकांची माहिती पोलीस शोधत आहेत. या जाहिरातीत देण्यात आलेल्या नंबरवरुन आयोजकांपर्यंत पोहचण्याचा प्रयत्न केला. परंतु, क्रमांक बंद येत होता. त्यामुळे कंपनीला मेल पाठविला आहे. त्याचे उत्तर आल्यानंतर संपूर्ण माहिती कळू शकेल. मात्र, यासंदर्भात अद्यापही कुणाचा तकार अर्ज आलेला नाही.
