(Pune Crime) पुणे : वाकडेवाडी येथील एसटी बस स्थानकातून चोरट्यांनी एका महिलेजवळील ९५ हजारांचा ऐवज चोरून नेल्याचा प्रकार घडला आहे. महिला बसमध्ये चढल्यानंतर गर्दीचा फायदा घेऊन या चोरट्यांनी त्यांच्या पर्समधील दागिने व रोकड चोरली आहे.
याप्रकरणी ५६ वर्षीय महिलेने खडकी पोलीस ठाण्यात तक्रार दिली आहे. त्यानूसार, अनोळखी चोरट्यांविरोधात गुन्हा दाखल करण्यात आला आहे. हा प्रकार बुधवारी दुपारी १२ वाजण्याच्या सुमारास घडला आहे.
मिळालेल्या माहितीनुसार, तक्रारदार या छत्रपती संभाजीनगर येथील असून त्याकाही कामानिमित्त पुण्यात आल्या होत्या. त्यांना परत छत्रपती संभाजीनगर येथे जायचे होते. त्यामुळे त्या वाकडेवाडी बस स्थानकात गेल्या होत्या. बस आल्यानंतर त्या बसमध्ये चढल्या. पण, बसमध्ये गर्दी होती. या गर्दीत चोरट्यांनी त्यांच्या पर्समधील ७० हजारांची रोकड व दागिने असा एकूण ९५ हजारांचा ऐवज चोरून नेला. पुढील तपास पोलीस करत आहेत.
