पुणे : तु आमच्याकडे खुनशी नजरेने का बगतो असे म्हणत चार जणांच्या टोळक्याने एका तरुणावर जीवघेणा हल्ला केल्याची धक्कादायक घटना घडली आहे. तरुणाला लोखंडी रॉडने बेदम मारहाण करुन हातातील रॉड हवेत फिरवून परिसरात दहशत माजवली. याप्रकरणी लोणी काळभोर पोलिसांनी चार जणांवर गुन्हा दाखल करुन एकाला अटक केली आहे. ही घटना रविवारी 14 जुलै रोजी रात्री साडे दहाच्या सुमारास कदमवाकवस्ती गावच्या हद्दीतील कवडीपाट येथे घडली आहे.
याबाबत अमर सोमनाथ थोरात (वय-21 रा. सावली अपार्टमेंट, कवडीपाट, कदमवाकवस्ती, ता. हवेली) यांनी लोणी काळभोर पोलीस ठाण्यात फिर्याद दिली आहे. त्यावरून सोमनाथ उर्फ डच्चा बबन लोंढे (रा. गुजरवस्ती, कदमवाकवस्ती, ता. हवेली) याला अटक केली आहे. तर प्रेम गायकवाड, राज पवार व त्याच्या एका साथीदारावर गुन्हा दाखल करण्यात आला आहे.
लोणी काळभोर पोलिसांनी दिलेल्या माहितीनुसार, अमर थोरात हे त्यांच्या दुचाकीवरुन गुजरवस्ती रस्त्याने घरी निघाले होते. त्यावेळी आरोपींनी रस्त्यात अडवून तु आमच्याकडे खुनशी नजरेने का बघतो, तुला मागच्या वेळेस सांगितलेलं समजलं नाही का? आम्ही इथले भाई आहोत, असं म्हणत दमदाटी केली. तसेच फिर्यादी आरोपींना समजावून सांगत असताना सोमनाथ याने शिवीगाळ करुन लोखंडी रॉडने बेदम मारहाण केली.
तर इतर आरोपींनी दगडाने डोक्यात आणि पाठीवर मारहाण करुन जखमी केले. त्यावेळी अमरचे मित्र त्याला सोडवण्यासाठी आले असता आरोपींनी त्यांना देखील शिवीगाळ करुन मारण्यासाठी अंगावर धावून आले. त्यानंतर आरोपींनी हातातील रॉड हवेत फिरवून दहशत पसरविली, असे फिर्यादीत म्हटले आहे. पुढील तपास लोणी काळभोर पोलीस करत आहेत.
