लोणी काळभोर, (पुणे) : पुणे – सोलापूर महामार्गावरील कदमवाकवस्ती ग्रामपंचायत हद्दीतील अंगूर वाईन्स येथे ट्रक, रिक्षा आणि एक किया कारचा अपघात झाल्याची घटना घडली आहे. आज शनिवारी (ता. 29) मध्यरात्री दोन वाजण्याच्या सुमारास हा अपघात झाला आहे. या अपघातात रिक्षाचालक जखमी झाला असून ट्रकचालक आणि कारचालक अपघात झाल्यानंतर फरार झाले आहेत.
याबाबत मिळालेल्या माहितीनुसार, सोलापूरच्या बाजूने जाणारा ट्रक हा पंक्चर झाल्यामुळे पुणे – सोलापूर महामार्गावरील अंगूर वाईन्स येथे थांबला होता. त्याचवेळी त्या ट्रकच्या पाठीमागे रिक्षाचालकाने रिक्षा लावून त्यामध्ये तो बसला होता. यावेळी सोलापूरच्या दिशेने निघालेली किया या चारचाकीची ओव्हरटेक करताना उभ्या असलेल्या रिक्षाला जोरात धडक दिली.
रिक्षाला जोरात धडक बसल्याने रिक्षा थेट उभ्या असलेल्या ट्रकच्या खाली गेली. यावेळी रिक्षात बसलेल्या व्यक्तीच्या हाताला व डोक्याला दुखापत झाली असून त्याला तात्काळ त्या ठिकाणी असलेल्या पोलीस मित्रांनी रुग्णालयात दाखल केले.
दरम्यान, हा अपघात एवढा भीषण होता की, यामध्ये तिन्ही वाहनांचे मोठे नुकसान झाले असून कोणतीही जीवितहानी झाली नाही. अपघातानंतर ट्रकचालक व किया या चारचाकी गाडीचे चालक दोघेही फरार झाले आहेत.
