चामोर्शी (गडचिरोली) : तालुक्यात गुरुवारी (६ जून) सायंकाळी ५ वाजताच्या सुमारास वेग-वेगळ्या ठिकाणी वीज पडून दोन जणांचा मृत्यू झाला. तर चारजण जखमी झाल्याची घटना घडली. वैभव देवेंद्र चौधरी (२१ रा. शंकरपूर हेटी) व गुरुदास मनीराम गेडाम (५० रा. गोवर्धन ता. चामोर्शी) असे मृत्यूमुखी पडलेल्यांची नावे आहेत.
चामोर्शी नगरपंचायत हद्दीमध्ये येणाऱ्या शंकरपूर हेटी येथे मुले क्रिकेट खेळत असताना अचानक वीज कडाडली व ती वीज कोसळल्याने वैभव चौधरी हा युवक जखमी झाला. लागलीच त्याला ग्रामीण रुग्णालय चामोर्शी येथे आणले असता डॉ. आकाश वाघमारे यांनी मृत घोषीत केले. तर अंकित देवेंद्र चौधरी (२३) हा जखमी झाल्याने त्याला उपचाराकरिता गडचिरोली येथे हलविण्यात आले.
तसेच तळोधी (मो.) जवळील गोवर्धन येथील गुरुदास गेडाम हा डोंगा दुरुस्तीसाठी नदीवर गेला असता त्याच्यावर वीज कोसळून मृत्यू झाला. या दोन्ही मृतक व्यक्तीचे शवविच्छेदन करून शव नातेवाईकांना सुपूर्द करण्यात आले. तर चामोर्शी तालुक्यातील मारोडा ग्रामपंचायतीचा शिपाई लेखाजी भय्याजी नैताम (४३) विजेच्या धक्क्याने जखमी झाला. त्याला उपचाराकरिता ग्रामीण रुग्णालय चामोर्शी येथे तर गोवर्धन येथील जखमींना तळोधी येथे भरती करण्यात आले आहे. या घटनेमुळे ग्रामीण रुग्णालय चामोर्शीचा भोंगळ कारभार चव्हाट्यावर आला असून लोकसंख्येने मोठा असलेल्या ताल्युक्यातील ग्रामीण रुग्णालयात रुग्णांची मोठ्या प्रमाणात गैरसोय होत आहे. केवळ शिकाऊ डॉक्टरवर भिस्त असून कर्मचारी सुद्धा सहकार्य करीत नसल्याने मृतांच्या नातेवाईकांनी मोठा गोंधळ केला.
