पुणे : नवीन वर्षाच्या सुरुवातीलाच सर्वसामान्यांसाठी दिलासादायक बातमी मिळाली आहे. एलपीजी सिलेंडरच्या किमतीत कपात झाली आहे. कच्चे तेल आणि गॅसच्या किमतीतील चढउतारांच्या पार्श्वभूमीवर केंद्र सरकारने नवीन वर्षाच्या सुरवातीलाच एलपीजी सिलिंडरच्या किमतीत कपात करून ग्राहकांना नवीन वर्षाचे गिफ्ट दिले आहे. इंडियन ऑइल कॉर्पोरेशन लिमिटेडने १९ किलो गॅस सिलिंडरच्या नवीन किमती जाहीर केल्या आहेत. मात्र, स्वयंपाकघरात वापरल्या जाणाऱ्या एलपीजी सिलिंडरच्या किमतीत कोणताही बदल झालेला नाही. पेट्रोलियम कंपन्यांनी आज, १ जानेवारी २०२४ पासून एलपीजी गॅस सिलिंडरच्या नवीन सुधारित किमती जाहिर केल्या आहेत.
मिठाईची दुकाने आणि लग्नसमारंभात वापरला जाणारा व्यावसायिक एलपीजी सिलिंडर आजपासून स्वस्त झाला असून, सरकारी तेल कंपनीने गॅस सिलिंडरच्या किमती किंचित कमी केल्या आहेत. १ जानेवारी २०२४ पासून एलपीजी सिलिंडरच्या सुधारित किमती लागू झाल्या आहेत. मात्र, घरगुती एलपीजी सिलिंडरचे दर ‘जैसे थे’ ठेवले आहेत.
तेल विपणन कंपन्यांनी जाहीर केलेल्या नवीन दरांनुसार दिल्ली ते पाटणापर्यंत व्यावसायिक गॅस सिलिंडरच्या किमतीत किंचित घट झाली आहे. दिल्लीत व्यावसायिक गॅस सिलिंडरच्या किमती केवळ १.५ रुपयांनी कमी झाल्या आहेत. अशा प्रकारे नवीन दरानुसार मुंबईत १७१० रुपयांना मिळणारा व्यावसायिक सिलिंडर आजपासून १७०८.५० रुपयांना मिळणार आहे.
सध्या दिल्लीत घरगुती सिलिंडर ९०३ रुपयांना उपलब्ध आहे. तर इंडियन ऑइलच्या वेबसाइटनुसार, घरगुती सिलिंडरच्या दरांमध्ये शेवटची मोठी कपात २० ऑगस्ट २०२३ रोजी झाली होती आणि सिलिंडरच्या किमती ११०३ रुपयांवरून ९०३ रुपयांवर म्हणजे तब्बल २०० रुपयांनी स्वस्त झाला होता. आज घरगुती सिलिंडरची किंमत मुंबईत ९०२.५० रुपये आहे.
