Elephants Dies : पश्चिम बंगाल राज्यातून एक हृदयद्रावक घटना समोर आली आहे. बक्सा व्याघ्र प्रकल्प आणि राष्ट्रीय उद्यानात आज एका पार्सल ट्रेनला झालेल्या भीषण अपघातात तीन हत्तींना आपला जीव गमवावा लागला आहे. राजाभटखवा आणि कलचिनी रेल्वे स्थानकाच्या जवळ असलेल्या शिखरी गेटजवळ सकाळी 7 वाजण्याच्या सुमारास ही घटना घडली आहे. यामध्ये दोन प्रौढ हत्ती आणि हत्तीच्या एका बाळाचा समावेश आहे.
मिळालेल्या अधिक माहितीनुसार, हे तीनही हत्ती रेल्वेचा रुळ ओलांडत होते. यावेळी अचानक आलेल्या पार्सल ट्रेनने या तीनही हत्तींना जोरदार धडक दिली. या धडकेत त्यांचा मृत्यू झाला. या घटनेची माहिती मिळताच वनविभागाचे अधिकारी घटनास्थळी दाखल झाले. त्यांनी हत्तींवर उपचार करण्याचे प्रयत्न केले. मात्र, उपचारापूर्वीच त्यांचा दुर्दैवी मृत्यू झाला.(Train Hit Elephants)
दरम्यान, रेल्वेची धडक बसल्यानंतर तीन हत्तींपैकी एक हत्ती ट्रेनच्या खाली पडल्यामुळे चीरडला गेला आहे. अंगावरुन चाक गेल्याने त्याच्या शरीरावर अनेक जखमा झाल्या असून अन्य दोन हत्तींनाही मोठ्या प्रमाणावर जखमा झाल्याची माहिती आहे. (Elephants Dies)
