ठाणे : ठाणे जिल्ह्यातील कळवा परिसरात आर्थिक वादातून 17 वर्षीय मुलाला विवस्त्र करून त्याला मारहाण केल्याची धक्कादायक घटना घडली आहे. २१ नोव्हेंबरला दुपारच्या सुमारास ही घटना घडली आहे. याप्रकरणी दोघांविरुद्ध गुन्हा दाखल करण्यात आला आहे. तौसिफ खानबांडे आणि समिल खानबांडे अशी आरोपींची नावे आहेत.
पोलिसांनी दिलेल्या अधिक माहितीनुसार,17 वर्षीय मुलाने गेल्या वर्षी एका आरोपीकडून 300 रुपये उसने घेतले होते. काही महिन्यांनंतर आरोपीने त्याचे पैसे परत मागायला सुरुवात केली, मात्र पीडित मुलाने पैसे द्यायला टाळाटाळ केली. याच रागातून आरोपीने मुलाचे ब्लूटूथ इअरफोन हिसकावून घेतले. पीडित मुलगा त्याचे ब्लूटूथ इयरफोन परत मागून घेण्यासाठी आरोपीच्या घरी गेला.
मात्र आरोपी घरी नसल्यामुळे तो त्याच्या आईला भेटला. हे समजताच आरोपीचा राग अनावर झाला, आणि तो दुसऱ्या आरोपीला घेऊन मुलाच्या घरी गेला. पुन्हा आरोपींनी त्या मुलाकडे त्यांचे पैसे मागितले आणि त्याच्यावर धारदार शस्त्राने वार केले. आरोपीने पीडिताचा बेल्ट ओढला आणि त्याच बेल्टने त्याला मारहाण केली.
या घटनेची माहिती आपल्या आईला दिली, त्यानंतर आईने पोलिसात आरोपीविरुद्ध तक्रार दाखल केली. तौसिफ खानबांडे आणि समिल खानबांडे अशी आरोपींची नावे आहेत. आरोपींवर भारतीय दंड संहिता (IPC) च्या कलम 327, 323, 504, 506, 34 आणि बाल न्याय (काळजी आणि संरक्षण) कायदा अंतर्गत गुन्हा दाखल करण्यात आला आहे.
