पिंपरी : “आपल्या कामाची दखल घेऊन प्रदान करण्यात आलेले पुरस्कार प्रेरणा देण्याचे काम करतात; मात्र, त्यामुळे वाढलेल्या जबाबदारीचे भान ठेवले पाहिजे,” असे विचार ज्येष्ठ साहित्यिक आणि समाजसुधारक पद्मश्री गिरीश प्रभुणे यांनी व्यक्त केले. चिंचवडगाव येथील पुनरुत्थान समरसता गुरुकुलम् येथे बुधवारी (ता. २२) यशवंतराव चव्हाण प्रतिष्ठान, पिंपरी-चिंचवड विभागाच्या वतीने उपक्रमशील शिक्षिका सुनीता पवार यांना साने गुरुजी शिक्षक प्रतिभा पुरस्काराने पद्मश्री गिरीश प्रभुणे यांच्या हस्ते सन्मानित करण्यात आले.
या वेळी ते बोलत होते. या वेळी यशवंतराव चव्हाण प्रतिष्ठान पिंपरी-चिंचवड विभागाचे अध्यक्ष पुरुषोत्तम सदाफुले, ज्येष्ठ साहित्यिक श्रीकांत चौगुले, डॉ. पी. एस. आगरवाल, सेवानिवृत्त शिक्षिका शोभा जोशी यांची प्रमुख उपस्थिती होती.
शिक्षिका सुनीता पवार या पिंपरी-चिंचवड महापालिकेच्या भूमकर चौकातील पब्लिक स्कूलमध्ये कार्यरत आहेत. पद्मश्री गिरीश प्रभुणे यांच्या हस्ते त्यांना सन्मानचिन्ह, शाल व तुकारामांची गाथा देऊन सन्मानित करण्यात आले. याप्रसंगी बोलताना पुरुषोत्तम सदाफुले म्हणाले की, समाजात असंख्य शिक्षक कार्यरत आहेत; परंतु आपले कर्तव्य बजावत असताना समाजासाठी उल्लेखनीय योगदान देणाऱ्या व्यक्तींचा शोध घेऊन त्यांचा उचित सन्मान करण्यासाठी प्रतिष्ठान कटिबद्ध आहे.
बाजीराव सातपुते यांनी प्रास्ताविक केले. श्रीकांत चौगुले यांनी सुनीता पवार यांच्या कार्याचा सविस्तर परिचय करून दिला. पुरस्काराला उत्तर देताना सुनीता पवार म्हणाल्या की, हा पुरस्कार म्हणजे ईश्वरीय इच्छा आहे. कार्यक्रमाच्या संयोजनात कैलास भैरट, सुभाष चव्हाण, अशोक महाराज गोरे, मुरलीधर दळवी, मानसी चिटणीस यांनी सहकार्य केले. प्रदीप गांधलीकर यांनी सूत्रसंचालन केले. सुरेश कंक यांनी आभार मानले.
