OBC Reservation जम्मू काश्मीर : राज्यात मराठा आरक्षणावरून महायुतीतच महाभारत सुरू झाले आहे. आरक्षणावरून मंत्री छगन भुजबळांनी घेतलेल्या टोकाच्या भूमिकेनंतर आता महायुतीतील नेत्यांमध्ये जोरदार वादावादी सुरु झाली आहे. सरकार ओबीसी समाजाला धक्का न लावता मराठा आरक्षण देणार आहे. ओबीसी समाजामध्ये कोणताही संभ्रम निर्माण करू नका, असा थेट इशारा मुख्यमंत्री एकनाथ शिंदे यांनी छगन भुजबळांना दिला आहे. जम्मू कश्मीरमधील कुपवाड्यात छत्रपती शिवाजी महाराजांच्या अश्वारुढ पुतळ्याचे अनावरण मुख्यमंत्र्यांच्या हस्ते करण्यात आले. त्यानंतर एका वृत्त वाहिनीशी बोलताना मुख्यमंत्र्यांनी हे वक्तव्य केले आहे.
मुख्यमंत्री एकनाथ शिंदे म्हणाले, आम्ही ओबीसी समाजाला धक्का न लावता मराठा आरक्षण देणार आहे. ओबीसी समाजामध्ये संभ्रम निर्माण करू नका. याबाबत राज्य सरकारची भूमिका स्पष्ट आहे. ओबीसी समाजाच्या आरक्षणाला धक्का न लावता मराठा समाजाला टिकणारं आरक्षण देणार आहे. ओबीसी समाजावर कोणताही अन्याय होणार नाही.
दरम्यान मराठा आरक्षणावरून महायुतीतच महाभारत सुरू आहे. छगन भुजबळांच्या वादग्रस्त वक्तव्यावर मंत्री शंभूराज देसाईंनी हल्लाबोल केला आहे. तर भुजबळ यांचे हे वक्तव्य सर्वपक्षीय बैठकीप्रमाणे असल्याचं सांगत भाजप प्रदेशाध्यक्षांकडून समर्थन देण्यात आले आहे. समोरून एन्ट्री मिळत नाही म्हणून मागच्या दरवाजातून ओबीसी आरक्षणात शिरण्याचा डाव आहे. भुजबळांच्या या वक्तव्याला मंत्री शंभूराज देसाईंनी कडाडून विरोध केला आहे. भुजबळांना भडक वक्तव्य करून वाद निर्माण करण्याची सवय आहे, अशी टीका शंभूराज देसाईंनी केली. उपमुख्यमंत्री अजित पवारांनी यामध्ये लक्ष घालावं असं आवाहन देसाईंनी केलं आहे.
मनोज जरांगेचे मराठा नेत्यांना आवाहन
तर दुसरीकडे मनोज जरांगे पाटील आक्रमक झाले आहे. मराठा समाजाच्या मुलांसोबत उभे राहण्याचे आवाहन मराठा नेत्यांना केले आहे.”मी यापूर्वी कधीच आवाहन केले नाही. पण आज मराठा नेत्यांना आवाहन करीत आहे. मराठा समाजातील मुलांच्या विरोधात सुरु असलेलं हे षडयंत्र हाणून पाडण्यासाठी सर्वांनी एकत्र आले पाहिजे. मी आज तुम्हाला सांगत आहे. उद्या म्हणायला नको, अगोदर आम्हाला का सांगितले नाही. तर, जात संपवू देऊ नका मराठ्यांच्या मुलांसोबत उभे रहा, हीच योग्य वेळ असून, एकत्र आला नाही तर मराठा समाज कधीच माफ करणार नाही असे आवाहन जरांगे यांनी मराठा नेत्यांना केले आहे.
