Hadapsar News : हडपसर, (पुणे) : पूर्ववैमनस्यातून एका १७ वर्षीय तरुणावर लोखंडी हत्याराने सपासप वार करुन त्याचा निर्घुण खून करण्यात आल्याची घटना घडली आहे. हि घटना रविवारी (ता. १७) रात्री १० वाजण्याच्या सुमारास हडपसरमधील मिरेकर वस्ती परिसरात घडली आहे. याप्रकरणी तीन अल्पवयीनसह ६ जणांना हडपसर पोलिसांनी ताब्यात घेतले आहे.
तीन अल्पवयीनसह ६ जणांना अटक
स्वप्नील विठ्ठल झोंबर्डे (वय १७, रा. शंकर मठ, मिरेकर वस्ती, हडपसर) असे खून झालेल्या तरुणाचे नाव आहे. याप्रकरणी विठ्ठल महादेव झोंबार्डे (वय ४६, रा. मिरेकर वस्ती, हडपसर) यांनी हडपसर पोलीस ठाण्यात फिर्याद दिली आहे.
सनी रावसाहेब कांबळे (वय २५), अमन साजिद शेख (वय २२) आकाश हनुमंत कांबळे (वय २३, सर्व रा. मिरेकर वस्ती, हडपसर) अशी त्यांची नावे आहेत.
पोलिसांनी दिलेल्या माहितीनुसार, फिर्यादी यांचा मुलगा स्वप्नील झोंबर्डे याचे आरोपीबरोबर पूर्वी भांडणे झाली होती. या भांडणाचा राग मनात धरुन त्यांनी स्वप्नील याच्या डोक्यावर लोखंडी हत्यारांनी वार करुन त्याला जीवे ठार मारले.
दरम्यान, सनी कांबळे व अमन शेख यांनी हातातील शस्त्रे हवेत फिरवून आमच्यासोबत कोणी पंगा घेतला तर त्याचा असाच मुडदा पाडू, अशी धमकी देऊन दहशत पसरविली. पोलीस उपनिरीक्षक महेश कवळे तपास करीत आहेत.
