पुणे : महाराष्ट्र लोकसेवा आयोगातर्फे (MPSC) घेण्यात येत असलेल्या महाराष्ट्र गट क सेवा मुख्य परीक्षा २०२१-संयुक्त पेपर १ च्या परीक्षेवेळी एक उमेदवार गैरप्रकार करताना आढळून आला आहे. या प्रकाराची गंभीर दखल घेऊन संबंधित उमेदवारावर एमपीएससीकडून कायदेशीर कारवाईची प्रक्रिया सुरू करण्यात आली असल्याची माहिती मिळाली आहे.
केवलसिंग चैनसिंग गुसींगे असे गैरप्रकार करताना आढळून आलेल्या उमेदवाराचे नाव आहे. त्याच्याजवळ मोबाईल फोन आणि ब्लूटूथ इयर फोन साहित्य सापडले असून एमपीएससीकडून गंभीर दखल घेत नियमानुसार कारवाईची प्रक्रिया करून गुन्हा दाखल करण्यात आला आहे.
महाराष्ट्र गट क सेवा मुख्य परीक्षा 2021-संयुक्त पेपर 1 करीता आज रोजी आयोजित परीक्षेच्या विविध उपकेंद्रांच्या ठिकाणी आयोगाच्या दक्षता पथकाने संशयित उमेदवारांची तपासणी केली.
— Maharashtra Public Service Commission (@mpsc_office) August 6, 2022
मिळालेल्या माहितीनुसार, एमपीएससीकडून महाराष्ट्र गट क सेवा मुख्य परीक्षा २०२१-संयुक्त पेपर १ परीक्षा राज्यभरातील सहा जिल्हा केंद्रांवर घेण्यात येत आहे. या परीक्षेच्या विविध उपकेंद्रांच्या ठिकाणी आयोगाच्या दक्षता पथकाने संशयित उमेदवारांची तपासणी केली. पुणे जिल्हा केंद्रांवरील नऱ्हे येथील उपकेंद्रावर केवलसिंग गुसींगे या उमेदवाराकडे गैरप्रकाराच्या उद्देशाने लपवलेले मोबाईल फोन आणि ब्लूटूथ इयर फोन इत्यादी साहित्य मिळून आले. या प्रकाराची एमपीएससीकडून गंभीर दखल घेत एमपीएससीच्या नियमानुसार कारवाईची प्रक्रिया करून गुन्हा दाखल करण्यात आला आहे.
याबाबत एमपीएससीचे सहसचिव सुनील अवताडे म्हणाले, की सदर परीक्षेमध्ये अत्याधुनिक उपकरणाच्या आधारे गैरप्रकाराचा प्रयत्न करण्यात येणार असल्याची माहिती आयोगाकडे प्राप्त झाली होती. त्यानुसार आयोगाच्या दक्षता पथकाने अचानकपणे संबंधित संशयित उमेदवारांची तपासणी केली. त्यात संबंधित उमेदवाराकडे गुन्हापात्र साहित्य आढळले. त्यावर गुन्हा दाखल करण्यात आला असून, पुढील कायदेशीर प्रक्रिया सुरू आहे.
