पिंपरी : इन्स्टावरील रिल्स बघणं एका तरुणाला तब्बल ५० लाखाला पडलं आहे. त्याच झालं असं इन्स्टाग्रामवर रिल्स पाहात असताना त्याने आलेल्या लिंकला क्लिक केलं. त्यानंतर परस्पर एका ग्रुपमध्ये जोडले गेले. त्यानंतर स्टॉक मार्केटमध्ये पैसे गुंतवण्यास भाग पाडून ५० लाखांची फसवणूक करण्यात आल्याची घटना घडली आहे. ही घटना १७ जुलै ते २३ नोव्हेंबरदरम्यान बावधन परिसरात घडली आहे.
याप्रकरणी आरोपीविरोधात सायबर पोलिस ठाण्यात गुन्हा दाखल करण्यात आला आहे. याबाबत पराग अशोक बाधोने (वय-४८, रा. बावधान) यांनी फिर्याद दिली आहे.
पोलिसांनी दिलेल्या माहितीनुसार, फिर्यादी हे रिल्स पाहत असताना आरोपींनी लिंकद्वारे त्यांना एका ग्रुपला अॅड केले. त्यानंतर स्टॉक मार्केटमध्ये ५० लाख ७७ हजार ६०० रुपये गुंतविण्यास भाग पाडले. ही रक्कम फिर्यादी काढण्यास गेल्यावर सदर रक्कम स्टॉक्समध्ये गुंतवल्याचे आरोपींनी सांगितले. त्यानंतर पुन्हा आरोपींनी २० लाख ७२ हजार ४९० रुपयांची मागणी केली. मात्र, अद्यापपर्यंत फिर्यादीस गुंतवलेली रक्कम आणि नफा मिळाला नाही. त्यामुळे झालेल्या फसवणुकीविरोधात फिर्यादीने सायबर पोलिसांत फिर्याद दिली आहे.
सोशल मीडियाचा मोठ्या प्रमाणात होत असलेल्या वापरामुळे फसवणुकीच्या घटनांमध्ये वाढ होत आहे. त्यामुळे नागरिकांनी ऑनलाईनद्वारे आलेल्या मॅसेजकडे दुर्लक्ष करून, त्यांच्या प्रलोभनांना बळी न पडता, सेबी रजिस्टर स्टॉक ग्रुपमध्येच खात्री करून पैशांची गुंतवणूक करावी, असे आवाहन सायबर पोलिसांनी केले आहे.
