viral news : कर्नाटकातील उडुपी जिल्ह्यात घडलेली एक थरारक आणि आश्चर्यचकित करणारी घटना सध्या चर्चेचा विषय ठरली आहे. “देव तारी त्याला कोण मारी” या म्हणीचा प्रत्यय देणारी ही घटना एका 62 वर्षीय वृद्धाच्या जीवावर बेतणार होती, पण शेवटी एका छोट्याशा योगायोगाने त्यांचा जीव वाचला.
श्रीनिवास आचार्य हे कम्बलाकाट्टे परिसरात एकटे राहत होते. 3 दिवसांपूर्वी ते घराजवळील विहिरीतून पाणी काढण्यासाठी गेले असताना अचानक दोरी तुटली आणि ते विहिरीत कोसळले. खोल विहिरीत पडल्यामुळे बाहेर येणे अशक्य झाले. मदतीसाठी त्यांनी अनेकदा हाका मारल्या, पण एकटं राहणं आणि परिसरातील अंतर यामुळे त्यांचा आवाज कुणापर्यंत पोहोचला नाही.
या 3 दिवसांत श्रीनिवास यांनी विहिरीतील एका नळीसारख्या पाईपचा आणि उरलेल्या दोरीचा आधार घेत स्वतःला जिवंत ठेवण्याचा प्रयत्न केला. अन्न-पाण्याविना ते अत्यंत अशक्त झाले होते. परिस्थिती गंभीर होत चालली असतानाच एक अनपेक्षित वळण आलं.
श्रीनिवास यांनी यापूर्वी गॅस सिलिंडर मागवला होता. तो वेळेत न आल्यामुळे त्यांनी गणेश नावाच्या ओळखीच्या व्यक्तीकडून सिलिंडर घेतला होता. काही दिवसांनी डिलिव्हरीसाठी आलेल्या व्यक्तीला घरात कोणी नसल्याने आवश्यक संकेत क्रमांक मिळाला नाही आणि तो परत गेला. ही बाब लक्षात आल्यानंतर गणेशला संशय आला आणि तो तात्काळ श्रीनिवास यांच्या घरी पोहोचला.
घर उघडं असूनही श्रीनिवास कुठेच दिसत नसल्याने गणेशने आसपास शोध घेतला. अखेर विहिरीत पाहताच त्याला श्रीनिवास दिसले. तात्काळ शेजाऱ्यांना बोलावण्यात आलं. स्थानिकांनी मदत करण्याचा प्रयत्न केला, पण अशक्तपणामुळे ते वर येऊ शकले नाहीत. त्यानंतर बचाव पथकाला कळवण्यात आलं. जवानांनी घटनास्थळी धाव घेत श्रीनिवास यांची सुरक्षित सुटका केली.
