मुंबई : दुबईहून तेल अवीवकडे जाणाऱ्या फ्लायदुबईच्या FZ1073 विमानात बुधवारी हवेतच गंभीर घटना घडल्याने खळबळ उडाली. विमानाने आधी ७७०० हा सामान्य आपत्कालीन कोड आणि त्यानंतर ७५०० हा विमानात बेकायदा हस्तक्षेप किंवा संभाव्य हायजॅकिंगचा संकेत देणारा कोड प्रसारित केला. त्यामुळे विमानाच्या अपहरणाची शक्यता निर्माण झाली आणि इस्रायलने खबरदारी म्हणून लढाऊ विमाने रवाना केली. मात्र, पुढे विमानातील दोन पायलटमध्ये झालेल्या हाणामारीमुळे ही परिस्थिती निर्माण झाल्याचे वृत्त समोर आले.
विमानाने मार्ग बदलत सौदी अरेबियातील तबूक विमानतळाकडे वळण घेतले आणि तेथे सुरक्षित इमर्जन्सी लँडिंग केले. फ्लायदुबईने विमानातील सर्व प्रवासी आणि क्रू सुरक्षित असल्याचे सांगितले असून, संबंधित यंत्रणांसोबत तपासात सहकार्य केले जात असल्याचे स्पष्ट केले आहे.
दरम्यान, इस्रायली माध्यमे आणि अधिकाऱ्यांच्या माहितीनुसार कॉकपिटमध्ये दोन पायलटमध्ये शारीरिक झटापट झाली. काही वृत्तांमध्ये एका पायलटवर चाकूने हल्ला झाल्याचा दावा करण्यात आला आहे. मात्र, या दाव्याची स्वतंत्रपणे पुष्टी झालेली नाही. घटनेचे नेमके कारण आणि कॉकपिटमध्ये नेमके काय घडले, याचा तपास सुरू आहे.
या घटनेदरम्यान विमानाची उंची झपाट्याने कमी झाल्याचे फ्लाइट-ट्रॅकिंग डेटामधून दिसून आले. विमान काही काळ सार्वजनिक फ्लाइट-ट्रॅकिंग सेवांवरूनही गायब झाले होते. त्यानंतर विमानाने तबूक येथे सुरक्षित लँडिंग केले. उपलब्ध वृत्तांनुसार विमानातील पायलट जखमी झाले असून त्यांना उपचारासाठी रुग्णालयात दाखल करण्यात आले आहे.
प्राथमिक माहितीनुसार, ही घटना सुरुवातीला संभाव्य हायजॅकिंग म्हणून पाहिली गेली होती. मात्र, नंतर पायलटांमधील हाणामारीमुळे आपत्कालीन संकेत सक्रिय झाल्याचे वृत्त समोर आले. त्यामुळे सध्या घटनेचे नेमके स्वरूप आणि कारण तपासाचा विषय आहे. विमानातील प्रवाशांना पुढील प्रवासासाठी पर्यायी व्यवस्था करण्याची प्रक्रिया सुरू असल्याचेही वृत्त आहे.
