शिरूर: पुणे जिल्ह्यातील शिरूर परिसरात दहशतवाद विरोधी पथकाने (एटीएस) मोठी कारवाई करत मॅफेड्रॉन (एमडी) या अमली पदार्थाची विक्री करणाऱ्या 2 तरुणांना ताब्यात घेतले आहे. या कारवाईत सुमारे 1,04,000 रुपये किमतीचा ड्रग्ज साठा जप्त करण्यात आला आहे. ही कारवाई 7 मार्च रोजी करण्यात आली.
रांजणगाव एमआयडीसी आणि शिरूर परिसरात एमडीसारख्या घातक ड्रग्जमुळे अनेक तरुण व्यसनाधीन होत असल्याची माहिती समोर आल्यानंतर पोलिसांनी याची गंभीर दखल घेतली. पुणे जिल्हा पोलीस अधीक्षक संदीपसिंह गिल यांच्या आदेशानुसार एटीएस पथकाने गुप्त माहितीच्या आधारे तपास सुरू केला.
तपासादरम्यान शिरूर हद्दीत पुणे-अहिल्यानगर महामार्गाजवळील ‘एम्पायर’ नावाच्या पान टपरीवर एक तरुण एमडी ड्रग्ज विकत असल्याची माहिती मिळाली. त्यानुसार एटीएस पथकाने शिरूर पोलीस स्टेशनच्या कर्मचाऱ्यांसह साध्या वेशात छापा टाकला.
या कारवाईत साहील संदीप करंजुले (वय 20, रा. पाडळी, रांजणगाव, ता. पारनेर, जि. अहिल्यानगर) आणि ओंकार संजय धावडे (वय 23, रा. रामलिंग रोड, शिरूर, जि. पुणे) यांना ताब्यात घेण्यात आले. त्यांच्या ताब्यातून विक्रीसाठी ठेवलेला एमडी ड्रग्ज साठा जप्त करण्यात आला.
या प्रकरणी शिरूर पोलीस स्टेशनमध्ये अमली पदार्थ कायद्यान्वये गुन्हा दाखल करण्यात आला असून आरोपींना पुढील कारवाईसाठी पोलिसांच्या ताब्यात देण्यात आले आहे. न्यायालयात हजर केले असता त्यांना 5 दिवसांची पोलीस कोठडी सुनावण्यात आली आहे.
ही कारवाई पुणे जिल्हा पोलीस अधीक्षक संदीपसिंह गिल, अपर पोलीस अधीक्षक रमेश चोपडे, उपविभागीय पोलीस अधिकारी प्रशांत ढोले, शिरूर पोलीस स्टेशनचे प्रभारी पोलीस निरीक्षक हेमंत शेडगे यांच्या मार्गदर्शनाखाली करण्यात आली.
या पथकात सहाय्यक पोलीस निरीक्षक प्रकाश पवार, सहाय्यक पोलीस उपनिरीक्षक महेश गायकवाड, विशाल गव्हाणे, पोलीस हवालदार निलेश कदम, रवींद्र जाधव, मोसीन शेख, ओंकार शिंदे, जालिंदर मुळीक तसेच शिरूर पोलीस स्टेशनचे पोलीस उपनिरीक्षक हनुमंत नकाते, पोलीस हवालदार नितीन सुद्रीक, राहुल भवर आणि पवन तायडे यांचा समावेश होता.
आरोपींकडील अमली पदार्थ कुठून आणले गेले आणि यामागे कोणते मोठे रॅकेट आहे याचा पुढील तपास पोलीस उपनिरीक्षक हनुमंत नकाते करत आहेत.
