सुरत: जोड्यांची अदलाबदल म्हणजेच ‘पार्टनर स्वॅपिंग’ या विषयाने सध्या गुजरातमध्ये खळबळ उडवून दिली आहे. सुरतसह वडोदरा, अहमदाबाद आणि राजकोटसारख्या मोठ्या शहरांत हे अनैतिक पार्टनर स्वॅपिंगचे जाळे पसरले असल्याच्या चर्चांना उधाण आले आहे. अनेक लोक या रॅकेटचा भाग असल्याचे समोर येत असून, पीडित महिला आता या विरोधात उघडपणे आपली बाजू मांडत आहेत.
महिलेने खाजगी वाहिनीला माहिती देतांना सांगितले कि, १ जुलै २०२२ रोजी तिचे लग्न झाले. लग्नानंतर काही काळ सर्व काही व्यवस्थित सुरू होते, पण काही महिन्यांतच तिच्या पतीने तिला पार्टनर स्वॅपिंगच्या घाणेरड्या धंद्यात सामील होण्यासाठी सक्ती करण्यास सुरुवात केली. पतीने तिला फेसबुकवरील काही चॅट्स दाखवून या जाळ्याची माहिती दिली, मात्र तिने सुरुवातीपासूनच या कृत्याला कडाडून विरोध केला.
या रॅकेटची कार्यपद्धती अत्यंत नियोजित असते. फेसबुकसारख्या सोशल मीडिया प्लॅटफॉर्मचा वापर करून बनावट नावांनी खाती उघडली जातात आणि त्यानंतर एकमेकांशी संपर्क साधला जातो. व्हिडिओ कॉलच्या माध्यमातून पसंती-नापसंती ठरवली जाते आणि त्यानंतर प्रत्यक्ष भेट घेतली जाते. धक्कादायक म्हणजे, या रॅकेटमध्ये पीडितेचा पती, नणंद आणि दीर हे देखील सहभागी होते, असा आरोप तिने केला आहे.
केवळ शारीरिक सुखासाठीच नव्हे, तर आर्थिक नफ्यासाठीही हे कृत्य केले जाते. एका रात्रीच्या बदल्यात २०,००० ते २५,००० रुपये मिळत असल्याने अनेक उच्चभ्रू व्यक्तीही याकडे आकर्षित होत असल्याचे तिने नमूद केले. पीडित महिला गेली ३.५ वर्षे न्यायालयात यासाठी लढा देत आहे. संसाराच्या नावाखाली होणाऱ्या या विकृतीविरुद्ध इतर महिलांनीही गप्प न बसता पोलिसांकडे धाव घ्यावी, असे आवाहन तिने केले आहे. या प्रकरणामुळे सामाजिक स्तरावर मोठी अस्वस्थता निर्माण झाली आहे.
