(Shirur Crime) शिरूर, (पुणे) : कोरेगाव भीमा – चौफुला रोडवरून वाजेवाडी (ता. शिरुर) ग्रामपंचायत हद्दीत रात्रीच्या सुमारास कंपनीत कामाला निघालेल्या दोन कामगारांना हातपाय बांधून मारहाण करीत दुचाकी, मोबाईल लुटून नेल्याची घटना घडली आहे.
याप्रकरणी अज्ञात तीन व्यक्तींवर शिक्रापूर पोलीस ठाण्यात गुन्हा दाखल करण्यात आला असून या घटनेने कामगारांत भीतीचे वातावरण पसरले होते.
पोलिसांनी दिलेल्या माहितीनुसार…!
संकल्प फिर्जींग कंपनीचा कामगार हरिष जगताप हा त्याच्या ताब्यातील दुचाकीहून कंपनीत कामासाठी निघाला होता. यावेळी तीन अज्ञात युवकांनी त्याला अडविले व शिवीगाळ, दमदाटी करत शेजारील शेतात घेऊन गेले. त्याचे कपडे काढून त्याच्या कपड्याने त्याचे हातपाय बांधून ठेवत त्याच्या जवळील मोबाईल, रोख रक्कम, एटीएम कार्ड काढून घेत मोबाईल वरुन ऑनलाईन रक्कम पाठवण्याचा पासवर्ड विचारून रक्कम पाठवली मात्र रक्कम सेंड न झाल्याने त्याच्या एटीएमचा पासवर्ड विचारून घेत त्याचीची दुचाकी घेऊन तिघेजण निघून गेले.
सदर इसमांनी त्या रस्त्याने येणाऱ्या वढू बुद्रुक येथील संकेत नामदेव भंडारी या युवकाला देखील मारहाण करत त्याच्याजवळील रक्कम व मोबाईल चोरुन नेला, मात्र हरिष जगताप या कामगाराला शेतातच दमदाटी करत हातपाय बांधून ठेवून तिघेजण निघून गेले, त्यावेळी हरिष याने स्वतःची सुटका करुन घेतली.
याबाबत हरिष पुंडलिक जगताप (वय – ३४ रा. राम नगर पेरणे फाटा ता. हवेली) यांनी शिक्रापूर पोलीस ठाण्यात फिर्याद दिली आहे. शिक्रापूर पोलिसांनी अज्ञात तीन युवकांवर गुन्हे दाखल केले असून पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली सहाय्यक पोलीस निरीक्षक वैभव पवार व पोलीस शिपाई निरज पिसाळ हे करत आहेत.
