दौंड : दौंडमध्ये गेले काही दिवस महायुतीचे उमेदवार राहुल कुल यांच्या प्रचारात तुरळक दिसणारा राष्ट्रवादी काँग्रेस अजित पवार गट गेली ३ ते ४ दिवसापासून भाजपचे उमेदवार राहुल कुल यांच्या प्रचारात कमालीचा सक्रिय झाला आहे. यामध्ये दौंड विधानसभा मतदारसंघात राष्ट्रवादी काँग्रेस पक्ष हा महायुतीचा आघाडी धर्म निश्चितच पाळणार आहे. त्यामुळे या निवडणुकीत महायुतीचे उमेदवार राहुल कुल यांना दौंडच्या पूर्व भागातून या भूतो ना भविष्य अशी मतांची आघाडी मिळवून देऊ असा विश्वास अजित पवार गटाच्या राष्ट्रवादी काँग्रेस पक्षाचे नेते आणि दौंड शुगरचे संचालक वीरधवल जगदाळे यांनी व्यक्त केला आहे.
तसे पाहता दौंडच्या पूर्व भागात अजित पवार गटाच्या वैशाली नागवडे, दौंड शुगरचे संचालक वीरधवल जगदाळे, शहराध्यक्ष गुरुमुख नारंग यांचा चांगला प्रभाव असून या भागात राष्ट्रवादी काँग्रेसला मानणारा मोठा मतदार आहे त्यामुळे त्यांनी दौंड शहरासह दौंड तालुक्याचा पूर्व भागावर अधिक लक्ष्य केंद्रित केले आहे.
दौंडच्या पूर्व भागातील गावांमध्ये आणि वाड्यावर वस्त्यांमध्ये जाऊन ते महायुतीचे उमेदवार राहुल कुल यांचा प्रचार करीत आहेत. यावेळी बोलताना वीरधवल जगदाळे म्हणाले की, उपमुख्यमंत्री अजित पवार यांच्या माध्यमातून दौंड तालुक्यात कोट्यवधी रूपयांचा विकासनिधी उपलब्ध झाल्याने रस्त्यांची कामे, जल जीवन सारख्या पाण्याचा प्रश्न मार्गी लागला आहे. तसेच अजित पवार यांना मानणारा शेतकरी निश्चितच महायुती सरकारला पाठिंबा देईल आणि दौंड च्या पुर्व भागातून महायुतीचे उमेदवार राहुल कुल यांना भरघोस मतांची आघाडी मिळेल विश्वास त्यांनी बोलताना व्यक्त केला.
