पुणे : पुण्यात लष्कर न्यायालयातील एका सहाय्यक सरकारी वकिल महिलेला १० हजारांची लाच स्वीकारताना लाच लुचपत प्रतिबंधक विभागाने रंगेहात पकडले आहे. गुन्ह्यात जप्त असलेली कार परत ताब्यात घेण्यासाठी न्यायालयात दाखल अर्जावर ‘म्हणणे’ मांडण्यासाठी त्यांनी लाच घेतली आहे. सहायक सरकारी वकील अंजला नवगिरे (वय-५४) असे गुन्हा दाखल झालेल्या महिलेचे नाव आहे.
याबाबत एका महिलेने (वय-३६) लाचलुचपत प्रतिबंधक विभागाकडे तक्रार दिली होती. त्यावरून अंजला नवगिरे यांच्याविरुद्ध वानवडी पोलीस ठाण्यात भ्रष्टाचार प्रतिबंध कायद्यान्वये गुन्हा दाखल करण्यात आला आहे.
लाचलुचपत प्रतिबंधक विभागाने दिलेल्या माहितीनुसार, तक्रारदार महिलेच्या पतीवर हडपसर पोलिस ठाण्यात गुन्हा दाखल आहे. गुन्ह्यात कार जप्त केली आहे. जप्त कार परत ताब्यात घेण्यासाठी तक्रारदारांनी वकिलामार्फत लष्कर न्यायालयात अर्ज दाखल केला होता. न्यायालयाने या अर्जावर नवगिरेला म्हणणे मांडण्यास सांगितले होते.
यासाठी तक्रारदार महिलेकडे १० हजार रुपयांची लाच मागितली. लाच देण्याची मुळीच इच्छा नसल्याने तक्रारदाराने लाचलुचपत प्रतिबंधक विभागात धाव घेत तक्रार दिली. लाचलुचपत प्रतिबंधक विभागाने सापळा रचून वकील नवगिरे यांना १० हजारांची लाच घेताना रंगेहाथ पकडले. याप्रकरणी गुन्हा दाखल करण्यात आला आहे. पोलीस अधीक्षक अमोल तांबे, अतिरिक्त पोलिस अधिक्षक डॉ. शीतल जानवे यांच्या मार्गदर्शनाखाली पथकाने ही कारवाई केली. पोलीस अधीक्षक रुपेश जाधव अधिक तपास करत आहेत.
