नगर: महागड्या दुचाकी चोरी करणारी टोळी कोतवाली पोलिसांनी जेरबंद केली असून चोरलेल्या महागड्या दुचाकीही हस्तगत केल्या आहेत. महागड्या दुचाकी चोरून त्या शेतात, जंगलात किंवा डोंगर भागात लपवायच्या. काही दिवसानंतर त्या वाहनांचा सोक्षमोक्ष लावायचा, चोरीची पद्धत पोलिसांनाही चकवा देणारी होती. आता, मात्र कोतवाली पोलिसांनी टोळीला बेड्या ठोकल्या आहेत.
याबाबत सविस्तर माहिती अशी की, सात डिसेंबर रोजी नगरच्या वैभव घोरपडे यांची पल्सर गाडी चोरीला गेल्याची फिर्याद दाखल करण्यात आली होती. गुन्ह्याचा तपास करत असताना पोलीस निरीक्षक चंद्रशेखर यादव यांना गुप्त बातमीदारामार्फत माहिती मिळाली की, सदरील दुचाकी चोर हे सराईत असून ते विविध भागातून दुचाकी चोरतात. ते सराईत नेवासा भागात सापडतील, अशी माहिती देखील मिळाली. त्यानंतर पोलीस निरीक्षक यादव यांनी लागलीच गुन्हे शोध पथक तयार करून नेवासा या ठिकाणी रवाना केले.
या पथकाने तीन दिवस तपास करून त्या ठिकाणाहून अमित अशोक नगरे व धनाजी ज्ञानदेव कुचेकर (दोन्ही रा. नेवासा फाटा, ता. नेवासा) या दोघांना ताब्यात घेतले. त्यांना चोरी केलेल्या दुचाकीबाबत माहिती विचारली. मात्र, त्यांनी प्रथम उडवाउडवीची उत्तरे दिली. खोटी माहिती देऊन तपासाची दिशाभूल केली. त्यांच्याकडे सखोल चौकशी केली असता त्यांनी नगर शहरातून ३, संभाजीनगर येथून ३ अशा एकूण ६ मोटारसायकल चोरी केल्याची कबुली दिली. त्यामध्ये बजाज पल्सर एन.एस.१२५, आर-१५, पल्सर २२०, एच.एफ. डिलक्स २, डेस्टिनी १२५ अशा सहा दुचाकींचा समावेश आहे. ५ लाख ५० हजारांच्या या ६ दुचाकी कोतवाली पोलिसांनी जप्त केल्या आहेत.
ही कारवाई पोलीस अधीक्षक राकेश ओला, अप्पर पोलीस अधीक्षक प्रशांत खैरे, उपविभाग पोलीस अधिकारी हरीश खेडकर यांच्या मार्गदर्शनाखाली पोलीस निरीक्षक चंद्रशेखर यादव, पोलीस अंमलदार तनवीर शेख, गणेश धोत्रे,योगेश भिंगारदिवे, शाहिद शेख, ए. पी. इनामदार, सलीम शेख, अतुल काजळे, अभय कदम, अमोल गाढे, संदीप थोरात, सुजय हिवाळे, सोमनाथ राऊत, वंदना काळे व दक्षिण मोबाईल सेलचे राहुल गुंडू आदींनी केली आहे.
