सोलापूर : सोलापूर शहरात विद्यार्थ्यांना घेऊन निघालेल्या रिक्षाला पाठीमागून आलेल्या भरधाव कारने धडक दिल्यानंतर रिक्षातून बाहेर फेकली गेल्याने महाविद्यालयीन तरुणीचा दुर्दैवी अंत झाल्याची घटना सोलापुरमध्ये घडली. भाग्यश्री निवृत्ती कांबळे (वय 17) असे मृत विद्यार्थिनीचे नाव आहे. या अपघातात ऐश्वर्या जगन्नाथ सोडगी, आदित्य सुनील भोसले हे दोन विद्यार्थी जखमी झाले. पुण्यश्लोक अहिल्यादेवी होळकर सोलापूर विद्यापीठासमोर शनिवारी (23 डिसेंबर) हा भीषण अपघात घडला. विद्यार्थ्यांना घेऊन निघालेल्या रिक्षाला पाठीमागून आलेल्या भरधाव कारने धडक दिल्याने हा अपघात घडला.
विद्यार्थ्यांना घेऊन निघालेल्या रिक्षाला पाठीमागून आलेल्या भरधाव कारने जोरात धडक दिल्यानंतर भाग्यश्री ही रिक्षातून बाहेर फेकली गेली. यानंतर ती सर्व्हिस रोडवर आपटल्याने गंभीर जखमी झाली. उपचारादरम्यान भाग्यश्रीचा मृत्यू झाला. अपघातात जखमी झालेल्या इतर दोन विद्यार्थ्यांवर सोलापुरातील खासगी रुग्णलयात उपचार सुरु आहेत. दरम्यान, या अपघातप्रकरणी अज्ञात कार चालकाविरोधात सोलापूरच्या फौजदार चावडी पोलीस ठाण्यात गुन्हा दाखल करण्यात आला आहे.
