पारगाव : महाराष्ट्र राज्य माध्यमिक व उच्च माध्यमिक शिक्षण मंडळाने घेतलेल्या बारावीच्या परीक्षेचा निकाल सोमवारी दु.१ वाजता जाहीर झाला आणि नेहमीप्रमाणे यंदाही निकालात मुलींनी बाजी मारली असल्याचे पहायला मिळाले.यामध्ये मुलींच्या उत्तीर्णतेची टक्केवारी ९४.५८ टक्के आहे तर मुलांच्या उत्तीर्णतेची टक्केवारी ८९.५१ टक्के आहे. म्हणजे मुलींची उत्तीर्ण होण्याची टक्केवारी ५.०७ टक्के अधिक आहे.राज्यातील इतर निकालाप्रमाणेच पारगाव येथील शेतकरी कुटुंबातील सिमरन सूर्यकांत भोसले हिने ८४.८३ % गुण मिळवत न्यू इंग्लिश स्कूल अँड ज्युनियर कॉलेजमध्ये प्रथम क्रमांक मिळवला असून सिमरन ने राहू केंद्रातही प्रथम येण्याचा मान मिळवला आहे.
सिमरन भोसले ही पूर्वी पासूनच अत्यंत हुशार असून तिने दहावी मध्ये मनोरमा मेमोरियल इंग्लिश मेडीयम स्कूल केडगाव येथून ९१%गुण मिळवले होते व आता बारावीत ही ८४.८३ गुण मिळवत पुन्हा एकदा आपली सिद्धता सिद्ध केली आहे.विशेष म्हणजे तिने दहावी -बारावी मध्ये बाहेरील कसलीही शिकवणी न लावता हे यश मिळवले आहे. पारगाव व परिसरातून तिच्या यशाचे खूप कौतुक होत आहे.
बारावीच्या निकालाने मी खुश आहे. त्या मला केंद्रात प्रथम येण्याचा मान मिळाल्यामुळे मी अजूनच खुश आहे. माझ्या यशामध्ये माझ्या आई वडिलांचा,शिक्षकांचा खूप मोठा वाटा असून त्यांनी माझ्याबरोबर खूप मेहनत घेतली त्यांच्यामुळेच मला हे यश संपादन करता आले.मला पुढे आय टी क्षेत्रात इंजिनियरिंग करायचे असून इंजिनियर बनून आई वडिलाचे स्वप्नं साकार करायचे आहे अशी प्रतिक्रिया सिमरन भोसले हीने व्यक्त केली.
