नवी मुंबई : सोशल मीडियाच्या दुष्परिणामाचा धक्कादायक प्रकार पनवेलमध्ये उघडकीस आला आहे. ११ वीत शिक्षण घेणाऱ्या १७ वर्षीय अल्पवयीन मुलाने इन्स्टाग्रामवरून १५ वर्षीय मुलीसोबत मैत्री केली. त्यानंतर तिला अश्लील व्हिडीओ बनवण्यास सांगून तो व्हिडीओ इन्स्टाग्रामवर पोस्ट करण्यास भाग पाडल्याचा धक्कादायक प्रकार समोर आला आहे. पनवेल तालुका पोलिसांनी या प्रकरणातील मुलाविरोधात आयटी अॅक्टसह विनयभंग तसेच पॉक्सो कलमानुसार गुन्हा दाखल केला आहे. या प्रकरणातील अल्पवयीन मुलगा व १५ वर्षे ७ महिने वयोगटातील पीडित मुलगी हे दोघेही पनवेलच्या वेगवेगळ्या भागात राहण्यास आहेत.
अल्पवयीन मुलगा हा अकरावीचे शिक्षण घेत असून, पीडित मुलगीदेखील शिक्षण घेत आहे. गेल्या ऑगस्ट महिन्यामध्ये यातील अल्पवयीन मुलाने पीडित मुलीसोबत इन्स्टाग्रामवर ओळख वाढवून मैत्री केली. त्यानंतर या दोघांनी चॅटिंग व व्हिडीओ कॉलद्वारे एकमेकांशी संवाद साधण्यास सुरुवात केली. यादरम्यान, अल्पवयीन मुलाकडून पीडित मुलीला नग्न होऊन तिचे व्हिडीओ बनवण्यास व ते व्हिडीओ त्याच्या इन्स्टाग्रामवर पोस्ट करण्यास वारंवार सांगण्यात येत होते.
त्यामुळे पीडित मुलीने गेल्या १५ सप्टेंबर रोजी आपला नग्नावस्थेतील व्हिडीओ तयार करून तो इन्स्टाग्रामवर पोस्ट केला. त्यानंतर तो व्हिडीओ काही वेळात व्हायरल झाल्यानंतर पीडित मुलीच्या आई-वडिलांना हा प्रकार लक्षात आला. त्यानंतर त्यांनी पनवेल तालुका पोलीस ठाण्यात धाव घेऊन तक्रार दाखल केली. या वेळी पोलिसांनी पीडित मुलीकडे विचारपूस केल्यानंतर इन्स्टाग्रामवरून मैत्री झालेल्या १७ वर्षीय अल्पवयीन मुलाच्या सांगण्यावरून तीने हा प्रकार केल्याचे सांगितले. त्यानुसार पोलिसांनी यातील मुलाविरोधात गुन्हा दाखल करून पुढील कार्यवाहीला सुरुवात केली आहे.
