पुणे : बांगलादेशातून घुसखोरीकरून भारतात आलेल्या एका तरुणीला पुणे रेल्वे स्थानक परिसरात बंडगार्डन पोलिसांनी पकडले आहे. याप्रकरणी तिच्यावर गुन्हा दाखल करण्यात आला आहे. मुसलमिया अब्दुल अजीज प्यादा (वय २७, रा. पश्चिम कोलागासिया, आमतुली, जि. बोरगुना, बांगलादेश) असं ताब्यात घेतलेल्या तरुणीचे नाव आहे. याबाबत पोलीस शिपाई भाग्यश्री सागर यांनी बंडगार्डन पोलीस ठाण्यात तक्रार दिली आहे.
पोलिसांनी दिलेल्या माहितीनुसार, मुसलमिया मंगळवारी सायंकाळी पुणे रेल्वे स्थानकातील फलाट क्रमांक ६ येथे असलेल्या रिक्षाथांब्याजवळ थांबली होती. गस्त घालणाऱ्या पोलिसांच्या पथकाला संशय आला. त्यामुळे त्यांनी तिच्याकडे चौकशी केली. तेव्हा ती उडवाउडवीची उत्तरे देऊ लागली. सखोल चौकशी केली असता ती बांगलादेशातून आल्याची माहिती मिळाली. तिच्याकडे पारपत्र तसेच भारतात प्रवेश करण्याबाबतची अधिकृत कागदपत्रे नव्हती. दलालाच्या मध्यस्थीने ती भारतात आल्याचे समोर आले.
तिने बेकायदाशीररित्या भारतात घुसखोरी केल्याचे उघडकीस आले. यानंतर तिला पोलीस ठाण्यात नेहून तिच्यावर पारपत्र कायदा, तसेच परकीय नागरिक आदेशाचा भंग केल्याप्रकरणी गुन्हा दाखल करण्यात आला. मुसलमियाने भारतात का प्रवेश केला? तसेच तिला पुण्यात कोणी आणले, यादृष्टीने तपास सुरू आहे. वरिष्ठ निरीक्षक रवींद्र गायकवाड यांच्या मार्गदर्शनाखाली सहायक निरीक्षक मुजावर तपास करत आहेत.
