वाघोली : पुणे-नगर महामार्गावर सतत वाहनांची रांग लागलेली असते. आज सकाळीच वाघोलीजवळ उबाळेनगर येथे रस्त्याच्या मधोमध ट्रक बंद पडल्याने नागरिकांना वाहतूक कोंडीला सामोरे जावे लागले. काही वेळ वाहतूक ठप्प झाल्याने रस्त्याच्या दोन्ही बाजूने वाहनांच्या रांग लागल्या होत्या.
वाघोलीतील उबाळेनगर परिसरात सकाळी ७ वाजण्याच्या सुमारास टाटा शोरुमच्या समोर ट्रक बंद पडला. ट्रक महामार्गाच्या मधोमध असल्याने हळूहळू वाहतूक कोंडीला सुरुवात झाली. यानंतर काही किलोमीटरपर्यंत वाहनांच्या रांग लागल्या. यामुळे नोकरी तसेच व्यावसायानिमित्त सकाळीच घराबाहेर पडलेल्या नागरिकांना मोठ्या मनस्तापाला सामोरे जावे लागले.
दरम्यान, हा ट्रक ढकलून बाजूला करण्याचा प्रयत्न नागरिकांनी केला. तो ट्रक रस्त्यावरून बाजूला गेल्यानंतर वाहतूक हळूहळू पूर्वपदावर आली. या कोंडीमुळे नागरिकांची मात्र गैरसोय झाली. लोणीकंद वाहतूक विभागाचे कर्मचारी ही कोंडी काढण्यासाठी प्रयत्न करत आहेत.
