लोणी काळभोर, ता.6 : लोणी काळभोर (तालुका हवेली) येथील तीर्थक्षेत्र रामदरा शिवालयात आज रामनवमी पारंपारिक अपूर्व उत्साहात व भक्तीभावाने साजरी करण्यात आली. दिवसभरात हजारो भाविकांनी महाप्रसादाचा लाभ घेतला. यानिमित्ताने विविध धार्मिक कार्यक्रमांचे आयोजन करण्यात आले होते. रविवारची सुट्टी, दहावी व बारावीच्या संपलेल्या परिक्षा यामुळे नेहमीपेक्षा यावर्षी भाविकांच्या संख्येत लक्षणीय वाढ झाली होती.
तीर्थक्षेत्र रामदरा शिवालयाचे संस्थापक देविपुरी महाराज उर्फ धुंदीबाबा यांनी गेल्या साठ वर्षांपुर्वी हे तीर्थक्षेत्र विकसित केले आहे. तेव्हापासून येथे रामनवमी मोठ्या उत्साहात साजरी केली जाते. आज पहाटे 5 वाजण्याच्या सुमारास श्रीं ना महामस्तकाभिषेक करून आरती करण्यात आली. दुपारी ढोल ताशांच्या गजरात “श्री” समवेेत धुंदीबाबा व मंगलपूरी महाराज यांच्या पादूकांंची मिरवणूक काढण्यात आली होती. यावेळी ढोल ताशांच्या गजरात स्थानिक तसेच पुणे, पिंपरी चिंचवड, सातारासह महाराष्ट्रातील विविध भागांतून आलेले भाविक मोठ्या उत्साहात सहभागी झाले होते. दुपारी बारा वाजता महंत हेमंतपुरी महाराज यांच्या हस्ते रामजन्मोत्सवाची आरती करण्यात आली. त्यानंतर भंडारा व महाप्रसादाचा कार्यक्रम पार पडला. पाडव्यापासून सुरू असलेल्या अखंंड हरिनाम सप्ताहाची आज सांगता झाली.
रामजन्माचा सोहळा झाल्यानंंतर भात, आमटी, बुंदीचा महाप्रसाद देण्यात आला. दर्शन व प्रसाद घेण्यासाठी आबालवृद्ध, महिला, तरुण भक्तांची झुंबड उडाली होती. स्वयंसेवक भाविकांच्या दुचाकी व चारचाकी वाहनांचे पार्किंग व्यवस्थित व्हावे म्हणून उपाययोजना करताना दिसत होते. यामुळे आलेली दुचाकी व चारचाकी वाहने मुख्य प्रवेशद्वाराच्या सुमारे अलीकडेच थांबवल्याने भाविकांना वाहतूक कोंडीचा त्रास जाणवला नाही. लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस पथकाचा चोख बंदोबस्त लावण्यात आला होता. त्यामुळे कसलाही अनुचित प्रकार घडला नाही. रात्री उशिरापर्यंत विविध भागातून भाविक दर्शनासाठी येत होते.
पीएमपीएमएलच्या वतीने हडपसर ते तीर्थक्षेत्र रामदरा दरम्यान बससेवा सुरू करण्यात आल्याने भाविकांनी समाधान व्यक्त केले. दुचाकी व चारचाकी वाहनांची व भाविकांची प्रचंड संख्या यामुळे पुणे कोल्हापूर लोहमार्गावरील पूलापर्यंत वाहतूक कोंडी झाली होती. पीएमपीएमएलने सुरू केलेली बससेवा, व्हाॅटस अप, फेसबुक सारख्या समाज माध्यमातून झालेला प्रचार व विविध माध्यमात छापून आलेल्या बातम्या, रविवारची सुट्टी व दहावी, बारावीच्या संपलेल्या परीक्षा आदी कारणांमुळे आज तीर्थक्षेत्र रामदरा येथे न भूतो न भविष्यती अशी भाविकांची गर्दी झाली होती.
