पुणे (Pune): देशात होणाऱ्या डिजिटल पेमेंट व्यवहारांमध्ये आकारमान (व्हॉल्यूम) आणि मूल्य (व्हॅल्यू ) या दोन्ही बाबतीत पुणे शहराने सर्वोच्च पाच शहरांमध्ये स्थान मिळवले आहे. डिजिटल पेमेंटच्या एकूण व्यवहारांमध्ये पुणे शहराचा वाटा ११ टक्के असून तो २०२३ च्या दुसऱ्या सहामाहीत ८ टक्के होता. तसेच एकूण व्यवहार मूल्यामध्ये पुणे शहराचा वाटा १० टक्के असून त्यामध्ये मागील वर्षीच्या तुलनेत ६ टक्के ची लक्षणीय वाढ झाल्याचे दिसून आले आहे.
याची माहिती वर्ल्डलाईन या संस्थेने दिली आहे. आर्थिक वर्ष २०२४ च्या सहामाहीत (जुलै-डिसेंबर २०२४) त्यांच्याद्वारे प्रक्रिया केलेल्या डिजिटल व्यवहारांचा नवीनतम अहवाल प्रकाशित केला. यामध्ये भारतातील वेगाने विकसित होणाऱ्या पेमेंट इकोसिस्टममधील प्रमुख ट्रेंड मांडण्यात आले आहेत. त्यामध्ये ही माहिती समोर आली आहे.
सर्वाधिक डिजिटल व्यवहार असलेल्या टॉप ५ शहरांमध्ये व्यवहारानुसार बेंगळुरू, नवी दिल्ली, मुंबई, पुणे, आणि हैदराबाद या शहरांचा समावेश आहे. वर्ल्डलाईन इंडियाचे मुख्य कार्यकारी अधिकारी रमेश नरसिंहन म्हणाले, भारतातील पहिल्या पाच शहरांमध्ये पुण्याला स्थान मिळाल्यामुळे कॅशलेस अर्थव्यवस्थेला त्यांनी जलदपणे स्वीकारले आहे, हे त्यातून स्पष्ट होत आहे. शहरातील गतिमान डिजिटल व्यवस्थेला तंत्रकुशल लोक, फिनटेक (अर्थ-तंत्रज्ञान) वातावरण आणि पायाभूत सुविधा यामुळे चालना मिळत आहे.