लोणी काळभोर : पुणे पेट्रोल डिलर्स असोसिएशनने लोणी काळभोर (ता. हवेली) येथील इंडियन ऑईल, हिंदुस्थान पेट्रोलियम व तरडे येथील भारत पेट्रोलियम या कंपनींच्या विरोधात विविध मागण्यांसाठी मंगळवार (ता.15) आंदोलन पुकारले होते. असोसिएशनच्या या सर्व मागण्या पेट्रोलियम मंत्र्यांकडे घेऊन जाऊन त्यावर तोडगा काढतो. असे आश्वासन केंद्रीय मंत्री मुरलीधर मोहोळ यांनी दिल्यानंतर पुणे पेट्रोल डिलर्स असोसिएशनने हे आंदोलन काही दिवसांकरिता स्थगिती दिली आहे.
पुणे पेट्रोल डिलर्स असोसिएशनने तेल कंपन्यांच्या विरोधात आंदोलन पुकारले होते. यामध्ये तेल कंपन्यांनी व्यवहार्य नसलेल्या दरांसह निविदा काढल्या आहेत, ज्यामुळे विक्रेत्यांना रिक्त कागदपत्रे/करारांवर स्वाक्षरी करण्यास भाग पाडले जाते. ई-लॉकिंग आणि वाहनांच्या ट्रॅकिंगसारख्या चोरी-प्रूफ प्रणालींमध्ये कंपन्या आणि डीलर्सकडून मोठ्या प्रमाणात गुंतवणूक करूनही चोरी सुरूच आहे. या यंत्रणांवर देखरेख ठेवणाऱ्या कंपनीच्या अधिकाऱ्यांच्या निष्काळजीपणामुळे व स्वार्थ पायी हे राजरोस चालू आहे. या मागण्यांसाठी केलेल्या आंदोलनाला पुणे व सातारा जिल्ह्यातील 900 वितरक/वाहतूकदारांनी पाठींबा दिला होता.
दरम्यान, केंद्रीय मंत्री मुरलीधर मोहोळ यांनी पुणे पेट्रोल डिलर्स असोसिएशनच्या मागण्या सोडविण्याचे आश्वासन दिले आहे. तसेच सणासुदीचा काळ लक्षात घेऊन असोसिएशनने दोन आठवड्यांत उत्सवाचा हंगाम संपेपर्यंत आंदोलन स्थगित करण्याचा निर्णय घेतला आहे.
डीलर्सना टेंडरच्या किमतीवर रिकाम्या पानांवर स्वाक्षरी करण्यास भाग पाडले जाते ही वस्तुस्थिती स्वतःच न्याय्य व्यापार पद्धतींच्या विरुद्ध आहे. हेच प्रश्न सर्व राज्यांना भेडसावत आहेत. त्यांच्याकडून पाठिंबा मिळाला आहे. हे प्रश्न न सुटल्यास राज्यव्यापी आंदोलनात सहभागी होऊ. असे त्यांच्याकडून सांगण्यात आले आहे. पण आम्हाला विश्वास आहे की आमच्या मागण्या न्याय्य आहेत आणि आम्हाला न्याय मिळेल. जो आमच्या डीलर्सना वाचवून दीर्घकालीन व्यापार सुधारण्यासाठी दिला जाईल.
-ध्रुव रुपारेल (अध्यक्ष – पुणे पेट्रोल डिलर्स असोसिएशन)
