पुणे : पुण्याच्या खडकीतील दारुगोळा कारखान्यातून काडतुसे चोरणाऱ्या कर्मचाऱ्याला गुप्तचर यंत्रणेने पोलिसांच्या मदतीने अटक केली आहे. त्याच्याकडून अटक 22 काडतुसे जप्त करण्यात आली आहेत. गणेश वसंतराव बोरुडे (वय 39, रा. कल्पतरु सोसायटी, खराडी रस्ता चंदननगर) असे अटक करण्यात आलेल्या आरोपीचे नाव आहे. याबाबत कारखान्यातील कनिष्ठ अभियंता जयेंद्र कस्तुरे यांनी खडकी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, खडकीतील दारुगोळा कारखान्यातून काडतुसे चोरुन नेण्यात येत असल्याची माहिती गुप्तचर यंत्रणेला मिळाली होती. त्यानंतर गुप्तचर यंत्रणेतील अधिकाऱ्यांनी याबाबतची माहिती दारुगोळा कारखान्यातील अधिकाऱ्यांना दिली होती. त्यानंतर खडकी पोलीस ठाण्यातील पोलिस अधिकारी आणि लष्करी गुप्तचर यंत्रणेतील अधिकाऱ्यांनी वेशांतर केले व दारूगोळा कारखान्यातील प्रवेशद्वार क्रमांक 12 जवळ सापळा रचला.
दुचाकीच्या डिकीतून 22 काडतुसे जप्त
दरम्यान, शुक्रवारी सायंकाळी साडेपाचच्या सुमारास गणेश कारखान्याच्या प्रवेशव्दारातून बाहेर आला. तेंव्हा पोलीस व लष्करी गुप्तचर यंत्रणेतील अधिकाऱ्यांनी त्याला पकडले. त्यानंतर गणेशची झडती घेण्यात आली, तसेच त्याच्या दुचाकीची तपासणी करण्यात आली. तेंव्हा दुचकीच्या डिकीत काडतुसे सापडली. त्यानंतर पोलिसांनी डिकीतून 22 काडतुसे जप्त केली.
आरोपी गणेशने यापूर्वी किती वेळा काडतुसे चोरले, याचा तपास करण्यात येत आहे. गणेशने चोरलेल्या काडतुसांची कोणाला विक्री केली आहे का? यादृष्टीने पोलिसांकडून तपास सुरू आहे. भारतीय हत्यार कायदा कलम, तसेच महाराष्ट्र पोलीस कायद्यान्वये आरोपी गणेश विरुद्ध गुन्हा दाखल करण्यात आला असून, पोलीस उपनिरीक्षक चौगले तपास करत आहेत.
