पिंपरी, (पुणे) : जुन्या वादाच्या रागातून पाच ते सहा जणांच्या टोळक्याने दोन तरुणांवर केलेल्या हल्ल्यात एकाचा जागेवरच मृत्यू झाला आहे तर एकजण गंभीर जखमी झाल्याची घटना घडली आहे. बुधवारी (ता. ११) रात्री अकरा वाजण्याच्या सुमारास पिंपरी-चिंचवड येथील निगडीतील ओटास्कीम येथे ही घटना घडली आहे. या घटनेने परिसरात एकच खळबळ उडाली आहे.
आकाश दूनधव (वय – २२ रा. ओटास्कीम, निगडी) असे हत्या झालेल्या तरुणाचे नाव आहे. तर आनंद उर्फ दादा राजू गवळी असे गंभीर जखमी झालेल्या तरुणाचे नाव आहे.
मिळालेल्या माहितीनुसार, निगडीमधील ओटास्कीम येथे बुधवारी रात्री अकरा वाजण्याच्या सुमारास मागील वादाचा राग मनात धरून पाच ते सहा जणांच्या टोळक्याने दोन तरुणावर धारदार हत्याराने वार केले. यावेळी आरोपी वार करून फरार झाले. त्यामध्ये आकाश दुनघव याचा जागेवरच मृत्यू झाला तर आनंद उर्फ दादा गवळी हा तरुण जखमी झाला.
मृत तरुणाच्या नातेवाईकाने आरोपीला जोपर्यंत अटक होत नाही, तोपर्यंत मृतदेह ताब्यात न घेण्याचे ठरवले आणि सर्वजण निगडी पोलिस स्टेशन येथे जाऊन पोलिसांना धारेवर धरले. निगडी पोलिस स्टेशनच्या वरिष्ठ अधिकारी यांना तात्काळ कारवाही करण्याचे आश्वासन दिल्यानंतर संतप्त नातेवाईकांनी मृतदेह ताब्यात घेतला.
दरम्यान, पुढील तपास निगडी पोलिस करत आहेत. मृत आकाश आणि आरोपी हे रेकॉर्डवरील गुन्हेगार आहेत. जुन्या भांडणाच्या कारणावरून हा प्रकार घडला असल्याची शक्यता पोलिसांनी वर्तवली आहे.
