पुणे : गांजा विक्री करणाऱ्या तडीपार भावाला सोडवण्यासाठी पोलिसांच्या अंगावर कुत्रा सोडल्याचा प्रकार घडला असून या कुत्र्याच्या हल्यात दोन पोलीस कर्मचारी जखमी झाले आहेत. हि घटना पिंपरी चिंचवड येथील वाकड येथे घडली आहे. या प्रकरणी वाकड पोलिसांनी तिघांवर गुन्हा दखल केला आहे
रवींद्र प्रकाश घाडगे (वय-२४), सागर प्रकाश घाडगे (वय-२७), अशोक तुपेरे (रा. तिघेही म्हातोबानगर, वाकड) अशी गुन्हा दाखल करण्यात आलेल्या तिघांची नावे आहेत. तर पोलीस नाईक संदीप पाटील असे जखमी झालेल्या पोलीस कर्मचाऱ्याचे नाव आहे. याप्रकरणी पोलीस हवालदार प्रदीप शेलार यांनी वाकड पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, पिंपरी-चिंचवड पोलिसांनी आरोपी रवींद्र घाडगे याला १ जुलै रोजी पुणे जिल्ह्यातून एक वर्षासाठी तडीपार केले होते. त्याचा तडीपारीचा कालावधी संपण्यापूर्वी तो शहरात आला असल्याची माहिती पोलिसांना मिळाली होती. त्यानुसार पोलिसांनी आरोपी रवींद्र घाडगे याच्या घरी जाऊन त्याची झडती घेतली. त्याच्याकडे २० हजार २५० रुपये किंमतीचा ८१० ग्रॅम गांजा, १ हजार ७०० रुपये रोख रक्कम, २० हजारांचा मोबाईल फोन असा ४१ हजार ९५० रुपयांचा ऐवज आढळला.
दरम्यान, रवींद्र घाडगे याच्याकडे चौकशी करत असताना त्याने हा गांजा अशोक तुपेरे याच्याकडून आणला असल्याचे पोलिसांना सांगितले. त्यानंतर रविंद्रचा भाऊ सागर हा पोलिसांच्या आंगावर धावून गेला. माझ्या भावाला सोडा, तुमचा काय संबंध असे म्हणत त्याने पोलिसांच्या अंगावर कुत्रा सोडला. त्या कुत्र्याने पोलिसांवर हल्ला केला. यात पोलीस जखमी झाले आहेत. घटनेनंतर आरोपीचा भाऊ सागर हा घटनास्थळावरुन फरार झाला. पोलिसांनी तडीपार रवींद्र याला ताब्यात घेतले असून सागरचा शोध घेण्याचे काम सुरू आहे. या प्रकरणी अधिक तपास वाकड पोलीस करत आहेत.
