पिंपरी, (पुणे) : पुणे-मुंबई द्रुतगती मार्गावर ओझर्डे गावच्या हद्दीत दोन वाहनांचा अपघात झाल्याची घटना घडली आहे. एका आयशर टेम्पोने दुसऱ्या वाहनाला धडक दिल्याने आयशर टेम्पोमधील एका व्यक्तीचा मृत्यू झाला असून एकजण गंभीर जखमी झाला आहे. हा अपघात गुरुवारी २८ मार्चला पहाटे चार वाजता घडला आहे. छोटेलाल रामजी यादव (वय ४२) असं मृत्यू झालेल्या व्यक्तीचे नाव आहे.
राज आमोद कुशवाह (१९, रा. अंबरनाथ, ता. कल्याण, जि. ठाणे) हे जखमी झाले आहेत. त्यांनी याप्रकरणी शिरगाव पोलिस ठाण्यात फिर्याद दिली आहे. त्यानुसार टेम्पो चालक शिवा राजू पटवा (२२, रा. अंबरनाथ, ता. कल्याण) याच्या विरोधात गुन्हा दाखल करण्यात आला आहे.
पोलिसांनी दिलेल्या अधिक माहितीनुसार, फिर्यादी राज कुशवाह, छोटेलाल यादव आणि शिवा पटवा हे आयशर टेम्पो घेऊन मुंबईकडून पुण्याच्या दिशेने जात होते. शिवा याने घाईत टेम्पो चालवून समोरून जाणाऱ्या एका वाहनाला जोरदार धडक दिली. या अपघातात टेम्पो मधील सहप्रवासी छोटेलाल यादव यांचा मृत्यू झाला. तर राज कुशवाह हे जखमी झाले आहेत. शिरगाव पोलिस अधिक तपास करीत आहेत.
