शिक्रापूर : कोरेगाव भीमा (ता. शिरूर) गावाच्या हद्दीमध्ये वढू बुद्रुक ते सणसवाडी रस्त्यावर अचानकपणे लागलेल्या आगीत पिकअप पूर्णपणे जळून खाक झाला. याबाबत विशाल विठ्ठल गुंडाळ (वय २५ रा. वढू बुद्रुक ता. शिरुर जि. पुणे) यांनी शिक्रापूर पोलीस स्टेशन येथे खबर दिल्याने पोलिसांनी अकस्मात जळीत अशी नोंद केली.
वढू बुद्रुक (ता. शिरुर) येथील विशाल गुंडाळ हे त्यांच्या ताब्यातील पिकअप घेऊन सणसवाडीकडे जात असताना कोरेगाव भीमा गावच्या हद्दीमध्ये आल्यानंतर पिकअपच्या पुढील भागातून अचानकपणे धूर येऊ लागल्याने विशाल यांनी खाली उतरुन पिकअपचे बोनेट उघडत असताना अचानक पिकअपला मोठी आग लागली. दरम्यान विशाल यांनी आग विझवण्याच्या प्रयत्न केला. मात्र आगीने पूर्ण वाहनाला वेढा घातला. पिकअप वाहन पूर्णपणे जळून खाक झाले. पुढील तपास पोलीस हवालदार संतोष मारकड हे करत आहेत.
