चंद्रपूर: आईच्या मृत्यूचे दुःख असहाय्य झालेल्या एका अल्पवयीन मुलीने पंख्याला गळफास लावून आत्महत्या केल्याची हृदयद्रावक घटना रविवारी सकाळच्या सुमारास रामनगर वेकोलि वसाहतीमध्ये उघडकीस आली. एकाच दिवशी आई व मुलीचा मृत्यूने शहरात हळहळ व्यक्त करण्यात येत आहे.
अल्पवयीन मुलीची आई तिरुमला श्रीनिवास कादासी (४२ वर्षे, रा. रामनगर, घुग्घुस) यांना रविवारी रात्री १२ वाजताच्या सुमारास अस्थमाचा अटॅक आल्याने त्यांना राजीव रतन रुग्णालयात उपचारासाठी दाखल करण्यात आले. मात्र, महिलेची प्रकृती गंभीर असल्याने तिला चंद्रपूर येथे हलविण्यात आले. रुग्णालयात उपचारासाठी नेत असताना वाटेतच त्यांचा मृत्यू झाला. त्यामुळे मृतदेह घरी परत आणला.
दरम्यान, आईच्या मृत्यूचे दुःख असहाय्य झाल्याने गायत्री श्रीनिवास कादासी (१६ वर्षे, रा. रामनगर, घुग्घूस) या मुलीने रविवारी रात्री १.३० वाजताच्या सुमारास घराच्या आतील खोलीत पंख्याला बेडशीट बांधून आत्महत्या केली, बराच वेळ होऊनही मुलगी खोलीतून न आल्याने रविवारी सकाळी दार तोडले तेव्हा मुलीने गळफास लावून आत्महत्या केल्याचे आढळून आले. ही घटना उघडकीस येताच पोलिसांनी घटनास्थळाचा पंचनामा केला. मर्ग दाखल करून जिल्हा सामान्य रुग्णालय, चंद्रपूर येथे शव विच्छेदन करण्यासाठी पाठविण्यात आले. एकाच दिवशी आई व मुलीचा मृत्यू झाल्याने शहरात हळहळ व्यक्त करण्यात येत आहे. या घटनेचा पुढील तपास पोलीस करीत आहेत.
