पुणे : राज्यभरात पावसाचा जोर पुन्हा एकदा वाढण्याची शक्यता निर्माण झाली आहे. हवामान विभागाने दिलेल्या अंदाजानुसार, कोकण, मध्य महाराष्ट्र आणि विदर्भातील अनेक भागांत मुसळधार ते अतिमुसळधार पावसाचा इशारा देण्यात आला आहे. या पार्श्वभूमीवर प्रशासनाने नागरिकांना आवश्यक ती काळजी घेण्याचे व सतर्क राहण्याचे आवाहन केले आहे.
विविध जिल्ह्यांसाठी दिलेला इशारा
रेड अलर्ट: पुणे घाट परिसरात अत्यंत मुसळधार पावसाची शक्यता असल्याने रेड अलर्ट देण्यात आला आहे.
ऑरेंज अलर्ट: रायगड, रत्नागिरी आणि सातारा घाट परिसरात जोरदार पावसाचा अंदाज वर्तवत ऑरेंज अलर्ट जारी करण्यात आला आहे.
यलो अलर्ट: ठाणे, सिंधुदुर्ग, कोल्हापूर घाट परिसर, तसेच विदर्भातील अकोला, अमरावती, भंडारा, बुलढाणा, चंद्रपूर, गडचिरोली, गोंदिया, नागपूर, वर्धा, वाशिम आणि यवतमाळ या जिल्ह्यांमध्ये यलो अलर्ट देण्यात आला आहे.
पुढील दिवसांचा हवामान अंदाज
26 जुलै: कोकण किनारपट्टीवर सोसाट्याच्या वाऱ्यासह जोरदार पाऊस पडू शकतो. मध्य महाराष्ट्रात काही ठिकाणी अतिवृष्टीची शक्यता आहे. विदर्भ व मराठवाड्यात हलक्या ते मध्यम स्वरूपाच्या सरी कोसळतील.
27 ते 29 जुलै: कोकणातील बहुतांश भागांत मुसळधार पाऊस कायम राहील. मध्य महाराष्ट्र, विदर्भ आणि मराठवाड्यात काही ठिकाणी विजांच्या कडकडाटासह आणि मेघगर्जनेसह मध्यम ते मुसळधार पावसाचा अंदाज आहे.
30 आणि 31 जुलै: या दिवसांत कोकण आणि विदर्भातील अनेक जिल्ह्यांत पावसाचा जोर कायम राहील, तर मध्य महाराष्ट्र आणि मराठवाड्यात पावसाचे प्रमाण थोडे कमी होऊन तुरळक ठिकाणी पाऊस पडण्याची शक्यता आहे.
नागरिकांनी घाट रस्ते किंवा नदीकाठच्या भागात प्रवास करताना हवामानाचा अंदाज घेऊनच बाहेर पडावे आणि सतर्क राहावे असे आवाहन हवामान खात्याकडून करण्यात आले आहे
