लोणी काळभोर, ता. 28 : लोणी काळभोर पोलिसांनी अवैध दारू विक्रीविरोधात सलग दोन दिवस धडक कारवाई करत कुंजीरवाडी आणि थेऊर परिसरातील दोन ठिकाणी छापे टाकले. या कारवाईत कुंजीरवाडी येथे 10 लिटर गावठी हातभट्टीची दारू, तर थेऊर येथील पान टपरीतून देशी-विदेशी दारूच्या बाटल्या आणि 1 हजार 150 रुपयांची रोकड, असा मुद्देमाल जप्त करण्यात आला. पोलिसांची चाहूल लागताच एका विक्रेत्याने घटनास्थळावरून पळ काढला, तर दुसऱ्या कारवाईत एका 21 वर्षीय तरुणाला ताब्यात घेण्यात आले.
पोलिसांनी दिलेल्या माहितीनुसार, 25 ऑगस्ट रोजी लोणी काळभोर पोलिस ठाण्याचे तपास पथक हद्दीत पेट्रोलिंग करत असताना कुंजीरवाडी, जुनी माळवाडी वस्ती, जुन्या कॅनॉलच्या पुढे एका दोन मजली घरासमोर गावठी हातभट्टीची दारू विक्री सुरू असल्याची गोपनीय माहिती पोलिसांना मिळाली. माहिती वरिष्ठ पोलिस निरीक्षकांना कळविल्यानंतर पोलिस उपनिरीक्षक योगेश पैठणे यांच्या मार्गदर्शनाखाली पोलिस पथकाने पंचांसह घटनास्थळी धाव घेतली.
आईसाहेब निवास, माळवाडी वस्ती, कुंजीरवाडी येथे पोलिसांनी पाहणी केली असता दादा विलास सकट हा दोन प्लास्टिकच्या कॅनसह उभा असल्याचे दिसले. पोलिसांची चाहूल लागताच सकट याने अंधाराचा फायदा घेत बोळातून पळ काढला. घटनास्थळी असलेल्या दोन कॅनची तपासणी केली असता त्यामध्ये उग्र वासाची गावठी हातभट्टीची दारू आढळली.
पोलिसांनी 10 लिटर गावठी हातभट्टीची दारू, अंदाजे 2 हजार रुपये किमतीची, जप्त केली. त्यातील नमुना तपासणीसाठी वेगळा काढून उर्वरित दारू जागेवरच नष्ट करण्यात आली. याप्रकरणी दादा विलास सकट याच्याविरुद्ध भारतीय न्याय संहितेतील संबंधित कलमांसह महाराष्ट्र दारूबंदी अधिनियम कलम 65 (ई) नुसार गुन्हा दाखल करण्यात आला आहे.
दरम्यान, लोणी काळभोर पोलिसांचे पथक अवैध धंद्यांवर कारवाईसाठी पेट्रोलिंग करत असताना थेऊर फाटा परिसरात एका पान टपरीत अवैधरित्या दारू विक्री सुरू असल्याची गोपनीय माहिती 26 ऑगस्ट रोजी मिळाली. पोलिसांनी पंचांसह सोनाई पान शॉप, कांबळे मळा, थेऊर रोड, थेऊर येथे छापा टाकला. त्यावेळी टपरीत ग्राहकांना दारूच्या बाटल्या देऊन पैसे स्वीकारले जात असल्याचे पोलिसांच्या निदर्शनास आले.
छाप्यात टपरीच्या ड्रॉव्हरमध्ये टँगो पंच देशी दारूच्या 90 मिलीच्या तीन बाटल्या, रॉयल स्टॅग व्हिस्कीची 180 मिलीची एक बाटली आणि 1 हजार 150 रुपये रोख, असा एकूण 1 हजार 550 रुपयांचा मुद्देमाल आढळून आला.
याप्रकरणी पोलिसांनी चेतन अंकुश घुले (वय 21, रा. पेटकर वस्ती, कुंजीरवाडी) याला ताब्यात घेतले. दारू विक्रीसाठी कोणताही वैध परवाना नसताना स्वतःच्या आर्थिक फायद्यासाठी देशी-विदेशी दारू विक्री केल्याप्रकरणी त्याच्याविरुद्ध महाराष्ट्र दारूबंदी अधिनियम कलम 65 (ई) नुसार गुन्हा दाखल करण्यात आला आहे. अवैध दारू विक्रीविरोधात लोणी काळभोर पोलिसांनी सलग दोन दिवस केलेल्या या कारवाईमुळे परिसरातील अवैध धंदे करणाऱ्यांचे धाबे दणाणले आहेत. पुढील तपास पोलिसांकडून सुरू आहे.
