पुणे : पुण्याच्या मध्यवर्ती भागात एकाच दिवशी लागोपाठ झालेल्या गोळीबाराच्या घटनांमुळे नागरिकांमध्ये भीतीचे वातावरण निर्माण झाले आहे. विशेष म्हणजे घोरपडे पेठ येथील पोलीस चौकीसमोरच भरदिवसा गोळीबार करण्यात आला. या गंभीर प्रकारामुळे शहरातील कायदा व सुव्यवस्थेवर प्रश्नचिन्ह उपस्थित झाले असून, पोलीस आयुक्त अमितेशकुमार यांनी या प्रकरणाची अत्यंत गांभीर्याने दखल घेतली आहे.
पोलीस चौकीसमोर घडलेल्या या घटनेनंतर पोलीस आयुक्तांनी आक्रमक पवित्रा घेत दोन वरिष्ठ अधिकाऱ्यांवर तडकाफडकी कारवाई केली आहे. खडक पोलीस ठाण्याचे वरिष्ठ पोलीस निरीक्षक शशिकांत चव्हाण आणि गुन्हे शाखा युनिट १ चे पोलीस निरीक्षक अजित जाधव यांची थेट नियंत्रण कक्षात बदली करण्यात आली आहे.
या कारवाईसोबतच इतर काही अधिकाऱ्यांच्या जबाबदाऱ्यांमध्येही बदल करण्यात आले आहेत:
धनंजय पिंगळे: खडक पोलीस ठाण्याचे नवीन वरिष्ठ पोलीस निरीक्षक (पूर्वी वाहतूक शाखा)
अंजुम बागवान: गुन्हे शाखेत बदली (पूर्वी वरिष्ठ निरीक्षक, येरवडा)
उमेश गिते: येरवडा पोलीस ठाण्याची नवी जबाबदारी
निळकंठ जगताप: लक्ष्मीनगर पोलीस ठाण्याचे गुन्हे निरीक्षक
काय आहे प्रकरण?
शुक्रवारी दुपारी घोरपडे पेठ पोलीस चौकीजवळ पहिली गोळीबाराची घटना घडली. त्यानंतर काही वेळातच लोहियानगर परिसरात काही अल्पवयीन मुलांनी हातात शस्त्रे घेऊन हवेत गोळीबार करत प्रचंड दहशत निर्माण केली.
जुन्या वैमनस्यातून सराईत गुंड अभिषेक उर्फ बाप्पा कसबे (वय 31) याने आपल्या 3 अल्पवयीन सहकाऱ्यांच्या मदतीने एका अल्पवयीन मुलावर बाबू मामडी चौकात गोळीबार केला होता. आरोपी बाप्पा कसबे याच्यावर यापूर्वीही खुनाचा प्रयत्न आणि बेकायदेशीर शस्त्र बाळगल्याचे गंभीर गुन्हे दाखल आहेत.
घटनेनंतर खडक पोलीस ठाण्याच्या पथकाने तातडीने शोधमोहीम राबवून मुख्य आरोपी बाप्पा कसबे याला अटक केली. सहाय्यक पोलीस निरीक्षक अमोल वळसंग यांच्या पथकाने ही कारवाई केली असून, तिन्ही अल्पवयीन साथीदारांना ताब्यात घेऊन बाल न्याय मंडळासमोर हजर करण्यात आले आहे.
