पुणे : राष्ट्रवादी काँग्रेसच्या खासदार सुप्रिया सुळे यांचा पुन्हा एकदा संसद महारत्न पुरस्काराने सन्मान होणार आहे. जनहिताचे उपस्थित केलेले प्रश्न, लोकसभेतील उपस्थिती, चर्चेतील सहभाग, खासगी विधेयक आणि सर्वोत्तम कामगिरीसाठी सुप्रिया सुळे यांना पुरस्काराने गौरविण्यात येणार आहे. सोळाव्या लोकसभेतील कामगिरीसाठीसुद्धा त्यांना संसद महारत्न पुरस्काराने गौरवण्यात आले होते. आता दुसऱ्यांदा त्या संसद महारत्न ठरल्या आहेत. दरम्यान, ‘प्राइम पॉइंट’ फाऊंडेशनचा संसदरत्न पुरस्कार त्यांना यापूर्वी सात वेळा प्रदान करण्यात आला आहे.
लोकसभेत उत्कृष्ट कामगिरी करणाऱ्या खासदारांना चेन्नई येथील प्राईम पॉईंट फौंडेशन आणि इ-मॅगॅझीनतर्फे दरवर्षी हा पुरस्कार देण्यात येतो. माजी राष्ट्रपती डॉ. ए. पी. जे. अब्दुल कलाम यांच्या संकल्पनेतून हा पुरस्कार सुरु करण्यात आला आहे, असे फौंडेशनचे के. श्रीनिवासन यांनी सांगितले. दरम्यान, सतराव्या लोकसभेत सुळे यांची कामगिरी सातत्यपूर्ण राहिली आहे. ९४ टक्के उपस्थिती लावत त्यांनी २३१ चर्चासत्रांमध्ये भाग घेतला आहे. सभागृहात त्यांनी आतापर्यंत ५८७ प्रश्न विचारले असून, १६ खासगी विधेयके मांडली आहेत. खासदार सुळे यांची संसदेतील सातत्यपूर्ण सर्वोत्तम कामगिरी आणि त्याच वेळी आपल्या मतदार संघातील नागरिकांसाठी जनहिताची केलेली कामे यांचा या पुरस्कार निवडीसाठी विचार करण्यात आला आहे.
हे यश माझ्या मतदारसंघातील प्रत्येकाचे आहे : सुप्रिया सुळे
सर्वोत्कृष्ट संसदीय कामगिरीसाठी दर पाच वर्षांनी देण्यात येणाऱ्या विशेष संसद महारत्न पुरस्कारासाठी दुसऱ्यांदा माझी निवड झाली, ही माझ्यासाठी अभिमानाची गोष्ट आहे. बारामती लोकसभा मतदारसंघातील जनतेने ज्या विश्वासाने मला लोकसभेत पाठविले, तो विश्वास सार्थ ठरविण्यासाठी सदैव प्रयत्न करणार आहे, अशा शब्दांत खासदार सुळे व्यक्त झाल्या. हा पुरस्कार कामाला मिळालेली पावती आहे. हे यश माझ्या मतदारसंघातील प्रत्येकाचे आहे. म्हणूनच हा पुरस्कार मतदारसंघातील जनतेला कृतज्ञतापूर्वक अर्पण करताना मला अतिशय आनंद होत आहे.
